Kompania “MABCO Constructions”, e ka paditur Qeverinë e Kosovës, përkatësisht Ministrinë e Drejtësisë, lidhur me rastin e Hotel Grandit, të cilin Behgjet Pacolli e kishte blerë, por që më pas i ishte anuluar ky privatizim.

Por, ndaj lajmit për padi ka reaguar ish-zëvendëskryeministri Behgjet Pacolli.

Përmes një shkrimi në Facebook, ka thënë se ai personalisht nuk ka kërkuar që shteti i Kosovës t’i paguajë diçka.

Pacolli thotë se firma e tij, Mabetex vetëm po kërkon kthimin e 6 milion eurove që i’u janë rrëmbyer padrejtësisht nga grupet mafioze të Kosovës.

“Në media kosovare lexova se “Pacolli në arbitrazh kërkon miliona EU nga Kosova”. Kjo nuk është krejtësisht ashtu, Mabetexi kërkon vetëm kthimin e mjeteve të veta. Në asnjë rast nuk është pretenduar as nga Pacolli ose dikush që ka lidhje me të që Kosova ti paguan diçka. Në arbitrazh, Mabetex në Lugano kërkon vetëm kthimin e 6 milion Eurove që i’u janë rrëmbyer padrejtësisht nga grupet mafioze të Kosovës, grupe këto që kishin depërtuar në institucionet e Kosovës. Sidoqoftë, nuk bëhet fjalë për paratë e Kosovës por për paratë e veta, të kompanisë që grupet mafioze në Kosovë i kanë rrëmbyer padrejtësisht”, shkruan ai.

Hotel Grandin e kishte blerë Mabco (Mabetex) e më pas i ishte anuluar ky privatizim.