Partitë politike ende nuk po arrijnë të gjejnë zgjidhje për demarkacionin, ani pse Presidenti Hashim Thaçi nënshkroi një aneks-marrëveshje me homologun e tij malazez.

Por, kryeministri Ramush Haradinaj tha se ishte ai që ka punuar shumë që korrektimi për Kullën e Çakorrin të përfshihej në dokument.

Madje, ai ka bërë të ditur se këtë punë e ka nisur qysh më 18 dhjetor, kur kishte darkuar me homologun e tij malazez në Bruksel.

Pavarësisht që vetë presidenti tha se kjo është veç një deklaratë e vullnetit të mirë, kryeministri thotë se ky dokument duhet të votohet bashkë me ligjin në Kuvend.

Kryeministri ka konfirmuar se seancë nuk do të ketë të martën. Ka thënë se për këtë çështje, që kanë humbur vite, nuk bëhet asgjë pse kalon edhe një javë.

Tha se duhet konsulta jo vetëm me Listën Serbe, por me secilin grup parlamentar.

Kur foli për Vetëvendosjen, tha se do të ishte mirë që deputetët veç e veç ta kuptojnë se ky përfundim është edhe falë rezistencës së VV-së.

Ndërkohë, KTV-ja merr vesh se për të bindur deputetë të VV-së që ta votojnë këtë marrëveshje janë përfshirë ambasadorët e disa vendeve në Kosovë.

“Na duhen veç edhe tri vota nga deputetë të Vetëvendosjes. Ne po synojmë t’i kemi ato vota që t’ia japim mesazhin Beogradit që çështjet e mëdha ne mund t’i kalojmë edhe pa ta, por ende mbetet shumë i vështirë realizimi i këtij synimi,” ka thënë për KTV-në një burim i afërt me takimet.

Për Listën Serbe, prioritet mbetet Asociacioni i komunave me shumicë serbe.

Deputeti Igor Simiq ka thënë për mediat serbe se për Listën është prioritet Asociacioni e tek pastaj mund të diskutohet për demarkacionin.

Qeveria mblidhet të mërkurën dy herë  për demarkacionin

Qeveria e Kosovës nesër do të mbajë mbledhje, me ç’rast do të tërheq Projektligjin për Demarkacionin, të dërguar më herër në Kuvend.

Brenda qeverisë kanë konfirmuar se pas kësaj do të mbahet një mbledhje tjetër në të cilën do të merret vendim për procedimin e këtij projektligji që i shtohet edhe aneks-marrëveshja e nënshkruar nga Presidenti i Kosovës, Hashim Thaçi dhe ai i Malit të Zi, Filip Vujanoviq.

Në këtë marrëveshje thuhet se do të bëhet korrigjimi dhe rishikimi i vijës kufitare mes të dyja shteteve.

“Kemi humbur gati 3 vjet për këtë dhe ndoshta na shkon edhe një javë, por duhet të jemi të përgatitur dhe të kemi kujdes në përgatitjen e seancës, por nuk ka kthim prapa”, ka thënë sot kryeministri Ramush Haradinaj.