Afro dy milionë euro nga Fondi i rezervave shtetërore janë shpenzuar vetëm gjatë tre muajve të parë të këtij viti. Për 18 vendime të nxjerra nga Qeveria e Kosovës ,për mbështetje financiare kryesisht për manifestime dhe organizime të tjera, është shpenzuar 40 për qind e buxhetit të ndarë për Fondin e rezervës, i cili ka shumën e përgjithshme prej 4.8 milionë eurosh.

Bazuar në Raportin tremujor të shpenzimeve të hartuar nga Ministria e Financave, përveç 500 mijë eurove që Qeveria kishte ndarë për realizimin e aktiviteteve për 11-vjetorin e Pavarësisë së Kosovës, ajo kishte marrë vendim që 300 mijë euro të tjera nga Fondi i rezervës të ndahen për Delegacionin Shtetëror në procesin e dialogut me Serbinë. Ky vendim ishte marrë në fund të vitit të kaluar, por që shpenzimet janë tërhequr këtë vit, shkruan sot Koha Ditore.

Më 26 shkurt të këtij viti, Qeveria kishte marrë vendim që t’i ndante 112 mijë euro për rregullimin e Parkut të Paqes në Komunën e Preshevës, mjete këto që i ka tërhequr nga Fondi i rezervës.

Për kompensimin e shtesave dhe stimulimin financiar për vitin 2019 për prokurorët specialë, Qeveria më 26 shkurt kishte marrë vendim që t’i ndante 171 mijë e 864 euro. Të njëjtën ditë kabineti qeveritar kishte vendosur që të ndante 25 mijë e 170 euro për manifestimin e “Epopesë së Dukagjinit”, 115 mijë e 740 euro për punën e Komisionit Shtetëror për shënjimin dhe mirëmbajtjen e kufirit shtetëror, si dhe 5 mijë euro për shoqatat e familjeve të personave të zhdukur për përkrahjen e funksionimit të tyre.