Në cilësinë e zëvendësministrit për Zhvillim Ekonomik, njëherësh kryetar i LDK-së në Ferizaj, Muharrem Svarqa, gjatë së premtes ka vizituar punimet për ndërtimin e një nënkalimi për vetura në Ferizaj i cili është vazhdimësi i projektit të ashtuquajtur “Bashkimi i Qytetit”.

Vizita e tij dhe e ministrit të Infrastrukturës, Arban Abarashit, ka ngjallur reagime dhe përçarje brenda kryesisë së LDK-së në Ferizaj, derisa Svarqa prej vitesh në cilësinë e kryetarit të degës e ka kundërshtuar publikisht projektin katër milionësh “Bashkimi i Qytetit”.

Gëzim Kokollari, anëtar i kryesisë së LDK-së, njëherësh këshilltar në KK të Ferizajt, e ka kundërshtuar vizitën e përfaqësuesve të LDK-së në Ferizaj, duke thënë se vizita e tyre nga niveli qendror, ishte e çuditshme në Ferizaj derisa subjekti i tyre e ka kundërshtuar vazhdimisht projektin “Bashkimi i Qytetit”.

“Sot Ferizaj merr mbështetje nga niveli qendror për projektin Bashkimi i Qytetit, ky projekt do të duhej të hetohej për parregullsitë në gjithë këtë proces e jo të promovohet. Siç dihet ky projekt nuk është transparent, nuk është bërë as diskutim publik, nuk ka kaluar në Kuvendin Komunal, nuk është në asnjë dokument strategjik komunal, nuk është në buxhetin komunal dhe nuk është në ligjin e buxhetit. Në këtë kohë prisja trajtim dinjitoz të ankesës që kam bërë në Ministrinë e linjës”, ka thënë Kokollari.

Ndërkohë, burime të Kohës brenda LDK-së, kanë thënë se vizita e Svarqës dhe e ministrit Abrashi në Ferizaj, ka ngjallur reagime dhe përçarje brenda subjektit.

“Është shumë shqetësuese se si liderët e LDK-së e përkrahin një projekt të tillë i cili deri tash është kundërshtuar nga dega e LDK-së në Ferizaj, madje kundërshtimet më të mëdha janë bërë publikisht edhe nga kryetari Svarqa”, ka thënë ky burim.

Ndërkohë, në anën tjetër zëvendësministri për Zhvillim Ekonomik, njëherësh kryetar i LDK-së, në Ferizaj, Muharrem Svarqa, në orët e mbrëmjes nëpërmjet një postimi në “Facebook”, ka thënë se ishte i nderuar ta shoqëronte ministrin e Infrastrukturës Arban Abrashin për inaugurimin e këtij projekti i cili është i rëndësishëm për qytetarët.

“Isha i lumtur tek po dëgjoja për të satën herë, zotimi i tij dhe i Qeverisë Hoti për t’i dhënë dinamikën e merituar projekteve të vonuara pa arsye, tregoi prakticizmin e tij dhe të Qeverisë, ashtu siç i duhet Kosovës. Ky zotim u bë sidomos për projektet ; Babush- Koshare nëpër Tërrn, atë të Burrnikut etj. Ishte një konsensues i pashkruar se për përfitime të reja, për të miren e banorëve të Komunës së Ferizajt, si të zonave rurale e urbane, pozitë e opozitë jemi bashkë”, ka shkruar Svarqa. Sipas tij, kjo u konfirmua edhe nga mikpritësi, kryetari i komunës së Ferizajt Agim Aliu por edhe nga zv.ministri Zariqi, që ishte pjesë e delegacionit qeveritar.

E, kryetari i komunës së Ferizajt, Agim Aliu, ka thënë se Ferizajt iu shtua edhe një projekt i ri që lidhet me atë “Bashkimi i Qytetit”.

“Vepra madhore e infrastrukturës rrugore, ajo e ndërtimit të nënkalimit për vetura nga rruga “Bajram e Gursel Sylejmani” në rrugën “Liman Rekaj” jo vetëm i kthen vëmendjen e zhvillimin kësaj zone të lënë pas dore për dekada, por edhe lehtëson në qind për qind qarkullimin rrugor të ferizajasve e lidhjen përmes këtij korridori rrugor të dy krahëve të qytetit që e ndante hekurudha. Bashkë me ministrin e Infrastrukturës, Arban Abrashi dhe zëvendësministrat Svarqa e Zariqi, bëmë hapin e parë në këtë projekt, pjesë e vizionit të “Bashkimit të Qytetit”, jetësimi i së cilës kthen këtë zonë në model të infrastrukturës sonë publike”, ka thënë midis të tjerash Aliu.