Versione të falsifikuara të vaksinës kundër COVID-19 të Pfizer janë identifikuar në Meksikë dhe Poloni.

Kjo është konfirmuar edhe nga një zëdhënës i Pfizer për ABC News – duke shtuar shqetësimin e përpjekjeve të mashtrimit në SHBA dhe ndërkombëtarisht.

“Ne jemi të vetëdijshëm se në këtë lloj mjedisi – të nxitur nga lehtësia dhe komoditeti i tregtisë elektronike dhe anonimati i ofruar nga interneti – do të ketë një rritje të prevalencës së mashtrimit, falsifikimit dhe veprimtarisë tjetër të paligjshme, siç ka të bëjë me vaksinat dhe trajtimet për COVID-19”, ka thënë zëdhënësi për ABC News, përcjell Telegrafi.

Një burim i njohur me këtë çështje i tha ABC News se një produkt kozmetik ndodhej brenda shisheve të vaksinave të rreme në Poloni dhe se Pfizer tani po punon ngushtë me autoritetet lokale.

Ky mashtrim i fundit u raportua së pari nga The Wall Street Journal, megjithatë, nuk është hera e parë që kjo çështje ngrihet në skenën ndërkombëtare.

Në shkurt, sekretari i shëndetësisë për shtetin meksikan të Nuevo León paralajmëroi për shitjen “klandestine” të “vaksinës së pretenduar kundër Covid-19”.

Një hetim zbuloi të paktën 80 njerëz janë paguar me qindra dollarë amerikanë për dozë për një vaksinë coronavirus – megjithëse substanca ishte e panjohur, dhe mund të ketë qenë ujë, apo diçka edhe më e dëmshme.

Sekretari i Shëndetësisë, Manuel de la O Cavazos, u kërkoi qytetarëve të mos i blinin këto substanca të panjohura.

Ndryshe, në mars, Organizata Botërore e Shëndetësisë lëshoi një alarm për vaksinat “e falsifikuara” të Pfizer të zbuluara në Meksikë, të cilat u ishin dhënë pacientëve jashtë programeve të autorizuara dhe që OBSH ka paralajmëruar në atë kohë “mund të jetë akoma në qarkullim në rajon dhe mund të vazhdojë të jenë te ofruara”.

Veç kësaj, autoritetet federale amerikane kanë kapur të paktën tetë faqe në internet në të cilat janë shfaqur disa si kompani bioteknologjike që ofrojnë trajtime dhe vaksina të coronavirusit, gjoja me qëllim që të vidhnin informacionin personal të njerëzve.