Njësiti i Drejtorisë për Hetimin e Trafikimit me Narkotikë i Pejës,ka njoftuar se pas një pune operativo-hetimore në terren ka arritur të sigurojë informacione të sigurta, se disa të dyshuar kanë marrë një sasi të substancës narkotike në Kosovë dhe janë duke provuar që të njëjtën ta dërgojnë në Serbi.

Njësiti i DHTN-Pejë në përkrahje të DHTN-Gjakovë dhe NJRSH-Pejë përmes një komunikate kanë njoftuar se kanë arritur që të ndalojnë një veturë me targa të Serbisë në fshatin Gurakoc të Istogut, në të cilën gjendeshin tre persona të dyshuar.

Me urdhër të prokurorit kompetent dhe gjyqtarit është kontrolluar vetura dhe personat e dyshuar. Gjatë kontrollit në pjesë të ndryshme të veturës janë gjetur dhe konfiskuar 19 paketime me substancë të dyshuar narkotike të llojit marihuanë, të cilat pas matjes kanë rezultuar të jenë me peshë: 9 kg 170.2 gram.

Personat e dyshuar dhe të arrestuar nga Policia e Kosovës janë:
· P. Q. viti i lindjes 1980, mashkull, shtetas i Serbisë,
· B. K. viti i lindjes 1987, mashkull, shtetas i Serbisë dhe
· B. K. viti i lindjes 1981, mashkull, shtetas i Serbisë.

Me vendim të prokurorit të njëjtëve u është shqiptuar masa e ndalimit policor prej 48 orësh. Po ashtu në cilësi të provave materiale është konfiskuar vetura dhe sasia e narkotikëve.