Ushtruesi i detyrës së kryetarit të PDK’së, Enver Hoxhaj, ka deklaruar se pasi partia e tij të marrë përgjigje në 10 pyetjet të cilat sot ua ka parashtruar Albin Kurtit dhe Vjosa Osmanit, partia e tij do të tregojë pozicionin për Presidentin.

Hoxhaj ka shkruar në Facebook se këto përgjigje janë thelbësore për të ardhmen e vendit.

“Kur të marrim një përgjigje për këto çështje që janë thelbësore për të ardhmen e Republikës së Kosovës, PDK-ja do të marrë qëndrim në organet e saj partiake në lidhje me pozicionin që do të ketë për zgjedhjen e Presidentit të Republikës së Kosovës”, ka shkruar Hoxhaj.

Statusi i plotë i Hoxhajt në Facebook:

Sot, Partia Demokratike e Kosovës është treguar konstruktive dhe parimore, në takim me kryetarin e Lëvizjes Vetëvendosje, Albin Kurtin dhe znj. Vjosa Osmani. Është jetike për shtetin që të kemi stabilitet politik, i cili që nga viti 2014 ishte minuar në baza ditore nga Kurti dhe disa parti tjera.

Në këtë takim, së bashku me Sekretarin e Përgjithshëm të PDK-së, Uran Ismailin, kemi shkuar me një listë prej 10 pikash për të cilat kemi kërkuar që Kurti ta sqarojë qëndrimin e tij. Kemi shkuar me parime e qëndrime të qarta për Kurtin dhe Osmanin, për kriteret që duhet t’i përmbushë një president, për politikën e jashtme, dialogun, Asociacionin e Komunave Serbe, Demarkacionin me Malin e Zi, Marrëveshjen e Washingtonit, Tregun e Përbashkët Rajonal, pezullimin e anëtarësimit në organizata ndërkombëtare dhe njohjet si dhe kundërshtimin e Planit të Ahtisaarit nga ana e Vetëvendosjes, reciprociteti me Serbinë, marrëveshjet e Brukselit dhe fusnota.

Kur të marrim një përgjigje për këto çështje që janë thelbësore për të ardhmen e Republikës së Kosovës, PDK-ja do të marrë qëndrim në organet e saj partiake në lidhje me pozicionin që do të ketë për zgjedhjen e Presidentit të Republikës së Kosovës.

PDK-ja gjithmonë ka luajtur rol konstruktiv në institucionet e Kosovës dhe ne do të luajmë rolin tonë opozitar karshi qeverisë së re.

Ndërkohë, këto janë 10 pyetjet që Hoxhaj ua ka parashtruar sot Kurtit dhe Osmanit:

1. Sa herë që ka pasur zgjedhje të Qeverisë ose të Presidentit nga Kuvendi i Republikës së Kosovës, institucionet janë sulmuar dhe dhuna është ushtruar ndaj shumicës në Kuvend, në seancë duke hedhur gaz ose duke u sulmuar institucioni i Kuvendit. Unë kam kërkuar ta di nëse z. Albin Kurti dhe Lëvizja Vetvendosje do të heqin dorë nga dhuna politike si mjet politik.
2. Kam kërkuar të di qëndrimin e tyre për dialogun për normalizimin e marrëdhënieve me Serbinë me qëllimin përfundimtar të njohjes reciproke. A do ta mbajnë ata premtimin e dhënë për qytetarët e Kosovës se nuk do të fillojnë dialog me Serbinë pa një kërkimfalje zyrtare nga Serbia dhe kthimin e të gjithë personave të zhdukur?
3. Kam kërkuar të di qëndrimin e tyre në lidhje me Asociacionin e Komunave Serbe. A do ta sjellin në Parlament anulimin e këtij projekti dhe të marrëveshjeve të Brukselit?
4. Ata i kam pyetur edhe lidhur me pozicionimin e tyre në lidhje me demarkimin e kufirit me Malin e Zi? Dhe nëse ata, në përputhje me shkëmbimin e letrave midis Presidentëve të Kosovës dhe të Malit të Zi, a do ta rishikojnë kufirin, posaçërisht për pjesën e Zhlebit dhe të Çakorrit, ashtu siç kishin premtuar. Ata duhet të dalin edhe me një afat kohor për jetësimin e këtij premtimi.
5. Nuk mora përgjigje po ashtu nëse ata do ta respektojnë dhe do ta zbatojnë Marrëveshjen e Uashingtonit?
6. I kam pyetur po ashtu nëse do të pranojnë të hynë në Tregun e Përbashkët Rajonal (Mini-Shengen) pa njohjen e plotë nga Serbia dhe Bosnja e Hercegovina?
7. Gjatë qeverive Kurti 1 dhe Hoti, sovraniteti i Republikës së Kosovës u pezullua kur këto qeveri u tërhoqën nga kërkimi i anëtarësimeve në organizata ndërkombëtare dhe njohje të Republikës së Kosovës. Kërkova të di nëse Kosova do të aplikojë për anëtarësim në organizata ndërkombëtare dhe se a do të kërkojnë njohje nga të gjitha vendet anëtare të Kombeve të Bashkuara duke i dhënë fund pezullimit të sovranitetit?
8. Trashëgimia juaj politike që nga viti 2007 ka qenë ta kundërshtoni Planin Ahtisaari, i cili është në thelb karakteri kushtetues i Kosovës. Kam kërkuar të di nga z. Kurti nëse ka hequr dorë nga ky qëllim?
9. Një premtim ka qenë edhe reciprociteti. Kam kërkuar të di nga ta nëse do të rikthehet reciprociteti me Serbinë dhe a do të jetë ashtu si gjatë qeverisë Kurti 1 reciprocitet administrativ apo do të zbatohet reciprocitet i plotë politik, ekonomik dhe tregtar?
10. Z. Kurti dhe znj. Osmani kanë kundërshtuar marrëveshjen e Brukselit në lidhje me fusnotën? Kam kërkuar një zotim nga ta nëse do ta anulojnë këtë marrëveshje dhe a do të tërhiqen nga fusnota, siç kanë premtuar gjatë gjithë viteve.