Mbrëmë në Bresje, kandidati për kryetar të Komunës së Fushë Kosovës nga Lëvizja Vetëvendosje, Valon Prebreza, ka mbajtur një tubim me qytetarët, ku atmosfera u karakterizua nga entuziazëm, përkrahje e madhe dhe besim në vizionin e tij për një qeverisje të ndershme dhe të përgjegjshme.

Takimi në Bresje shënoi një tjetër ndalesë të rëndësishme në fushatën e balotazhit, duke treguar mobilizimin e vazhdueshëm të qytetarëve të të gjitha moshave që po i bashkohen frymës së ndryshimit.

Në adresimin e tij, Prebreza theksoi rëndësinë që ka bashkëpunimi mes qytetarëve dhe institucioneve komunale për ndërtimin e një Fushë Kosove që ofron mundësi të barabarta për të gjithë. Ai rikujtoi se fushata e tij është ndërtuar mbi parime të qarta: ndershmëri, përkushtim dhe transparencë, duke i dhënë prioritet qytetarit si qendër të vendimmarrjes lokale.

Tubimi në Bresje u shoqërua me përkrahje të madhe nga banorët, të cilët shprehën bindjen se Fushë Kosova meriton një drejtim të ri dhe të drejtë, në shërbim të interesit publik.

Në përmbyllje, Valon Prebreza falënderoi qytetarët për besimin dhe për angazhimin e tyre në këtë fazë vendimtare të fushatës, duke theksuar se fryma që po vjen nga secili fshat e lagje e komunës është dëshmi e qartë se Fushë Kosova po bashkohet për ndryshim dhe për një të ardhme më të mirë për të gjithë.