Në prag të zgjedhjeve të jashtëzakonshme parlamentare, vendet e QUINT-it u kanë bërë thirrje partive politike për formimin e një Qeverie stabile.

Mbretëria e Bashkuar, Franca, Gjermania dhe vendet e tjera presin që më 28 dhjetor Kosova të zhvillojë një proces zgjedhor të lirë, të ndershëm dhe demokratik. Ambasadori i karrierës, Albert Prenkaj, në një deklarim për rtv21 vlerësoi se thirrjet e tilla janë sinjal se faktori ndërkombëtar po kërkon që sa më parë të rikthehet bashkëpunimi.

“Thirrjet po bëhen me qëllim që Kosova sa më shpejt të rikthejë rrugën e bashkëpunimit dhe koordinimit me komunitetin ndërkombëtar, rrugë kjo nga e cila, tash e disa vite, Qeveria e kaluar Kurti 2, si dhe mbajtja e pushtetit për një periudhë në mënyrë të paligjshme dhe jolegjitime, kanë bërë që Kosova të mbetet si një lloj apendiksi në tërë rrugëtimin e Ballkanit Perëndimor drejt anëtarësimit në NATO dhe në BE.”, tha Prenkaj.