Presidenti i Iranit, Masud Pezeshkian, ka mohuar zërat për një dorëheqje të mundshme, duke deklaruar se nuk ka ndërmend të largohet nga posti.

Në një video të publikuar nga disa agjenci iraniane të lajmeve, Pezeshkian tha se, nëse ndonjëherë do të merrte një vendim të tillë, do ta bënte të ditur zyrtarisht.

“Për momentin, do të qëndroj i vendosur”, deklaroi ai.

Presidenti iranian hodhi poshtë edhe spekulimet për një përçarje mes tij dhe liderit suprem të Iranit, ajatollah Mojtaba Khamenei.

“Ata duan të krijojnë përshtypjen se ka një mosmarrëveshje. Lideri thotë një gjë, ndërsa ata pretendojnë se unë them diçka tjetër”, u shpreh Pezeshkian.

Videoja, e titulluar “Raport për popullin”, pritet të publikohet e plotë në ditët në vijim.

Prej javësh, në mediat dhe rrjetet sociale kanë qarkulluar raportime të pakonfirmuara se Pezeshkian po përgatitej të jepte dorëheqje. Këto spekulime u shtuan pas raportimeve për vrasjen e ish-liderit suprem, ajatollah Ali Khamenei, në sulmet e 28 shkurtit, si dhe pas njoftimit se pasardhësi i tij do të ishte djali, Mojtaba Khamenei.