Rreth 1.300 “veteranë të rrejshëm”, që i janë shtuar aktakuzës së përpiluar nga ish-prokurori Elez Blakaj, nuk janë aplikues nga Ushtria Çlirimtare e Preshevës, Medvegjës e Bujanocit, siç ka tentuar ta arsyetojë Prokuroria e Shtetit rritjen e numrit të veteranëve të rremë nga 19 mijë në më shumë se 20 mijë.

1.300 veteranët e rinj janë persona që janë futur në listë pas dorëheqjes së Blakajt në zona të ndryshme të Ushtrisë Çlirimtare të Kosovës, shkruan sot Koha Ditore.

Të dhënat e aktakuzës se re me logo të Prokurorisë së Shtetit që janë publikuar në media, vërtetësinë e të cilave Prokuroria nuk e ka kontestuar, gazeta i ka krahasuar me aktakuzën e shkruar nga Blakaj, një kopje të së cilës e posedon, dhe që ka botuar pjesë të saj.

Tek të dhënat e aktakuzës së përgatitur nga Blakaj dhe aktakuzës në të cilën ka ndërhyrë PSh-ja dallimet janë evidente.