Pesë të akuzuarit për terrorizëm, të cilët u arrestuan dy vjet më parë te Liqeni i Badovcit nuk do të ndiqen penalisht për shkaktim të rrezikut të përgjithshëm.

Prokuroria Speciale e Kosovës ka bërë rikualifikimin e veprave penale, duke i ndryshuar kështu një pjesë të përmbajtjes dhe të elementeve të aktakuzës, shkruan Koha Ditore.

Tani, Besnik Latifi, Gazmend Haliti, Milazim Haxhiaj dhe Enis Latifi akuzohen për veprën penale: përgatitje e veprave të terrorizimit, kurse Fehmi Musa akuzohet për ndihmë në kryerjen e këtyre veprave.

Të pestit u arrestuan më 10 korrik të vitit 2015 nën dyshimin se janë përkrahës të Organizatës Terroriste ISIS. Prokuroria beson se pas një marrëveshjeje paraprake, të akuzuarit kanë shkuar te Liqeni i Badovcit për të xhiruar një videoincizim, në të cilin do të betoheshin për shtrirjen e Shtetit Islamik në Kosovë nën urdhrat e liderit të asaj organizate Ebu Bekr Al – Baghdadi.