Ministri i Zhvillimit Ekonomik, Blerand Stavileci, ka vizituar sot kompaninë “Formon”, e cila ka lansuar projektin më të ri Printer 3D, prodhimi i parë i këtij lloji i dalë nga kompanitë vendore.

Më këtë rast, ministri Stavileci duke përgëzuar kompaninë për arritjet e tyre ka rikonfirmuar edhe një herë mbështetjen e tij për kompanitë që merren me fushën e Teknologjisë Informative (TIK).

“Nuk është e rastësishme që në kuadër të agjendës tonë në kuadër të pikave më të rëndësishme për të ardhmen e vendit tonë e vendosim teknologjinë e informacionit dhe komunikimeve elektronike, sepse kjo fushë i përket të ardhmes, është një ekonomi e bazuar në dije dhe kreativitet dhe këto janë gjëra që i përkasin rinisë kosovare”, është shprehur ministri Stavileci, duke shtuar se tashmë kompanitë e TIK-ut, po tregojnë vendosmëri që kreativitetin e tyre ta lansojnë në tregun ndërkombëtar”.

Ministri Stavileci më këtë rast ka pohuar se këto kompani me angazhimin e tyre serioz do të demonstrojnë së janë në gjendje të garojnë në tregjet e huaja

“Produkti printer 3 D është dëshmia më e mirë që kompanitë, të cilat kanë nisur me pritje të vogla tashmë me punën të cilën e kanë bërë me profesionalizmin e të rinjve kosovarë kanë arrit një pikë e cila na bënë edhe neve të mrekullohemi”, u shpreh Stavileci.

Rron Cena, drejtor Ekzekutiv i Kompanisë “Formon” tha se produkti printer 3D, do të jetë i dobishëm për përdorim personal dhe për biznese të vogla.

“Është hera e parë që në rajon ka një brend të tillë që merret me prodhimin, zhvillimin, dizajnimin komplet të një produkti elektronik duke filluar prej një sistemi të makinerisë, atë të elektronikës dhe softuerit”, tha Cena.