Zyrtarë të rëndësishëm të Shteteve të Bashkuara të Amerikës, vazhdojnë të theksojnë se raportet mes Kosovës e SHBA-së, aktualisht nuk janë në nivelin e duhur, si pasojë e veprimeve të njëanshme të institucioneve të Kosovës.

Qytetarët kanë mendime të ndryshme rreth deklaratave të zyrtarëve amerikanë, se në të kaluarën Kosova kishte raporte më të mira me SHBA-në sesa i ka tani.

Shaip Hajrizi thotë se raportet me aleatin me të madh të Kosovës, Amerikën janë në nivelin me të ulët, dhe krejt kjo si pasojë e gabimeve të kryeministrit Albin Kurti.

“Unë mendoj që nuk ka njeri normal që nuk e din që raportet me SHBA-në dhe BE-në i ka prish kryeministri Albin Kurti. Kurrë ne raportet më të këqija e as sanksione nuk kemi pasur. Ato sanksione erdhën nga gabimet e Albin Kurtit. Koordinimi në rend të parë me SHBA-në sepse është mik i yni, mik i Kosovës, ata na kanë çliruar. Ata po na ruajnë kufirin e kryeministri ynë po i thotë naiv njeriut të dytë të Bidenit edhe po thotë nuk kam nevojë për juve sepse unë jam shtet sovran. Kush po ta ruan ty kufirin, qysh mundësh me i thënë, a ka logjikë, qysh një kryeministër normal më thënë jam sovran a kufijtë po t’i ruan KFOR-i, sovran është kur t’i i ruan kufijtë vet”, tha ai.

Mirëpo, mendime ndryshe kanë Halil Doda e Ahmet Bllaca.

“Kurti bën një politikë që i nevojitet shtetit të vet dhe Amerika njerëzit e vendosur i do, kurrë nuk i urren Amerika, e din kush është Kurti”, tha qytetari Doda.

“Raportet e Kosovës me ShBA-në nuk varen nga një njeri (Kurti)”, mendon ai.

Ndërsa, Bllaca thotë se Kurti është më proamerikan se shumë të tjerë të cilët e akuzojnë për prishje me Amerikën.

“Nuk është e vërtet aspak që i kemi prishur marrëdhëniet diplomatike me SHBA-në, pse Amerika është nëna jonë, ajo Amerikë me nënën e vet Anglinë edhe me aleatet e vet na kanë bërë shtet, kurrë nëna nuk e braktis fëmijën. Albin Kurti është pro amerikan, ma amerikan se krejt këta që dalin e flasin që thonë po na prish punë u marr vesh ky me kohë”, tha Bllaca.

Të martën, i dërguari i SHBA-së për Ballkanin Perëndimor, Gabriel Escobar, tha se raportet e Kosovës me Amerikën, kanë qenë shumë më të mira në të kaluarën, sesa janë aktualisht.