Ministrja e Mjedisit dhe Planifikimit Hapësinor, Albena Reshitaj, ka pritur në takim kryetarin e Vushtrrisë, Xhafer Tahiri me të cilin kanë biseduar për projektet që MMPH-ja po i financon në këtë komunë.

Ministrja Reshitaj ka shprehur gatishmërinë e saj që sipas mundësive buxhetore t’i përkrah komunat në projektet e tyre zhvillimore e në veçanti në fushën e mjedisit.

Kryetari Tahiri prezantoi disa projekte që komuna e Vushtrrisë synon t’i realizojë. Ai kërkoi mbështetje nga MMPH-ja për blerjen e 50 kontejnerëve të mbeturinave për amvisni.

Çështje tjetër që u diskutua në këtë takim ishte edhe rregullimi i shtratit të lumit sitnica. Ministrja e njoftoi kryetarin e Vushtrrisë se për rregullimin e shtratit të Drinit të Bardhë dhe Sitnicës, ku do të investohen 3 milionë e 50 mijë euro për vitet 2018-2021 ku 200 mijë euro janë paraparë të investohen këtë vit.

“Fillimisht duhet të bëhet një studim fizibiliteti për ta parë se ku saktësisht duhet intervenuar më shpejt. Pas këtij studimi do të nisë pjesa e parë e projektit”, është shprehur ministrja Reshitaj.

Sa i përket mbeturinave, ministrja Reshitaj e paraqiti projektin për deponitë ilegale me të cilin do të bëhet largimi i deponive ilegale dhe shndërrimi i tyre në zona të gjelbra.

Ministrja kërkoi nga kryetari i Vushtrrisë, Xhafer Tahiri, që ta fuqizojë inspektoratin komunal dhe të punojë në tri fushat kryesore që kanë të bëjnë me mjedisin, tokën, ujin dhe ajrin.