Reuters ka shkruar se avokatët e ish-presidentit të Kosovës, Hashim Thaçi, thanë të mërkurën se ai duhet të shpallet i pafajshëm për akuzat për krime lufte  që pretendojnë se ka udhëhequr një kapje të dhunshme të pushtetit politik nga Ushtria Çlirimtare e Kosovës në fund të viteve 1990.

Thaçi dhe tre ish-komandantë të tjerë të UÇK-së akuzohen për përndjekje, vrasje, tortura dhe zhdukje të detyruara të njerëzve gjatë dhe menjëherë pas kryengritjes së vitit 1998-1999, që më pas çoi në pavarësinë e Kosovës nga Serbia.

Avokati Luka Mishetiq i tha gjyqtarëve në Dhomat e Specializuara për krime lufte në Hagë se pretendimet e prokurorëve se Thaçi dhe tre të tjerët zhvilluan një fushatë të dhunshme për të marrë kontrollin politik mbi gjithë Kosovën janë një përpjekje e pabazuar për të “rikthyer” historinë e vendit.

“Ka dyshime të mjaftueshme për t’ju lejuar të shpallni pafajësinë për të gjitha pikat e aktakuzës,” tha Mishetiq.

Asnjë provë e drejtpërdrejtë, thotë mbrojtja

Ekipi mbrojtës i Thaçit tha se nuk ka prova që e lidhin drejtpërdrejt Thaçin me ndonjë nga krimet e pretenduara dhe se nuk ka prova që tregojnë se ai kishte kontroll mbi komandantët e tjerë të UÇK-së.

“Nuk ka urdhra në dosje nga Thaçi për kryerësit e krimeve. Nuk ka raporte nga kryerësit e krimeve për Thaçin”, tha Misetic.

“Nuk ka asnjë provë të besueshme që ai ka qenë i përfshirë personalisht në kryerjen e krimeve të luftës”, shtoi ai.

Thaçi, 57 vjeç, i cili ka shërbyer si kryeministër, ministër i Jashtëm dhe president i Kosovës midis 2008 dhe 2020, dhe bashkëakuza e tij mohojnë të gjitha akuzat.

Të hënën, prokurorët kërkuan një dënim me 45 vjet burg për Thaçin dhe të tjerët në përfundim të një gjykimi që zgjati pothuajse tre vjet.

Ata thonë se gjatë viteve 1998-1999 u vranë më shumë se 100 kundërshtarë politikë dhe persona të perceptuar si bashkëpunëtorë të forcave serbe, ndërsa qindra u keqtrajtuan në rreth 50 kampet e ndalimit që menaxhohej nga UÇK-ja, përcjell portali Dukagjini.

Dhomat e Specializuara të Kosovës, të përbëra nga gjyqtarë dhe avokatë ndërkombëtarë, u krijuan në vitin 2015 për të trajtuar çështjet e krimeve të luftës nën ligjin e Kosovës. Gjykata u vendos jashtë Kosovës për shkak të shqetësimeve për intimidim të dëshmitarëve.

Pritet që vendimi të jepet brenda tre muajve.