Kampioni i Kosovës, Feronikeli, e zhvillon nesër(e martë) ndeshjen e kthimit ndaj Slovan Bratislavës në kuadër të kualifikimeve për Ligën e Europës.

---

Kampioni i Kosovës dhe ai i Sllovakisë përballen nesër në ‘Fadil Vokrri’ për të zhvilluar ndeshjen e kthimit të raundit të dytë kualifikues në Ligën e Europës.

Ndeshja e parë kishte përfunduar me rezultatin 2-1 në favor të sllovakëve, duke mbetur gjithçka e hapur për ndeshjen e kthimit.

Në një bisedë për Gazetën Metro, sulmuesi i Feronikelit, Kastriot Rexha, e vlerëson këtë ndeshje shumë të rëndësishme, teksa kundërshtarin e cilëson si shumë të fortë.

“Për ne është ndeshje shumë e rëndësishme. Përballë kemi një kundërshtar shumë të fortë, por ne shpresojmë në kualifikim” tha fillimisht golashënuesi më i mirë i Superligës së Kosovës në sezonin e fundit.

Tutje, Rexha foli edhe për thirrjet kundër Kosovës që tifozët e Slovan Bratislavës i kishin bërë gjatë ndeshjes së parë, teksa kërkon nga tifozët e ‘Niklit’ që të mos bien pre e ndonjë eksesi.

“Për ne nuk kanë pasur e as nuk kanë ndikim thirrjet e tyre që kanë bërë gjatë ndeshjes. Futbollistët e Slovan Bratislavës kanë qenë shumë të mirë dhe të sjellshëm gjatë gjithë ndeshjes. Andaj, ftojmë tifozët mos të bien pre e ndonje ekcesi apo diçka që do e dëmtonte imazhin tonë dhe nuk do të shkonte në favor tonin” – deklaroj Rexha.

Ndryshe, ndeshja e kthimit mes Feronikelit dhe Slovan Bratislavës zhvillohet prej orës 18:00 në stadiumin ‘Fadil Vokrri’.