Dushan Bozucanin është njëri nga serbët që luftuan në krah të separatistëve rusë në Ukrainë. Atje u lidh me shumë serbë e rusë të tjerë. Por, Dushan Bozucanin u pa të shtunën në Beograd, në mesin e veteranëve në një protestë para ndërtesës së presidencës së Serbisë, si shprehje e pakënaqësisë me gjendjen e tyre sociale dhe të drejtat e tyre.

Federata Ruse Serbinë e konsideron si çerdhe të ndikimit më të madh në Ballkan. Këtë ndikim e ka shtrirë në shumë dimensione në Serbi. Por, përveç lidhjes më Kishën Ortodokse, lidhja më e fortë ruso-serbe konsiderohet lidhja në mes të luftëtarëve të këtyre dy popujve.

Në protestën e së shtunës, në përkrahje të veteranëve doli edhe rusi Albert Andrej, i cili humbi njërin sy në luftimet e Koshares në Kosovë në betejë me UÇK-në.

Edhe pse Serbia ka miratuar masat ligjore që sanksionojnë pjesëmarrjen në luftëra të huaja, numri i serbëve që luftuan në Ukrainë ishte shumë i madh. As organet e drejtësisë në Beograd nuk kanë ndërmarrë hapa në zbatimin e këtyre normave sanksionuese.

Dushan Bozucanin është njëri nga vullnetarët serbë që ishte i pranishëm në Ukrainë në krah ët rusëve separatistë. Ndërkohë në Beograd shëtisin lirshëm shumë serbë të tjerë që dikur ishin pjesë e strukturave paramilitare ruse në Ukrainë.

Stevan Milosevic ka marrë pjesë në Ukrainë në krah të forcave separatiste e paramilitare ruse, kurse në Serbi është parë duke qëndruar në krah të organizatës shoviniste serbe “Obraz”.

Stevan Milosevic, ka qenë së paku dy herë edhe në Kosovë. Njëherë në vitin 2013, në Mitrovicën e veriut dhe në vitin 2014 në Gazimestan, me rastin e Vidovdanit – Betejës së Kosovës.

Nuk duhet harruar përpjekjen e Rusisë që përmes serbëve u përpoq që të godiste me atentat Milo Djukanovicin në fund të vitit 2016./PORTALI.info/