Fallon Sherrock u shënua në histori si femra e parë që mposhti një mashkull në Botërorin e pikados.

Sherrock ishte e pafjalë pasi të martën mbrëma në “Alexandra Palace” të Londrës mposhti me 3:2, 22-vjeçarin Ted Evetts në Kampionatin Botëror të pikados në serinë PDC. Kjo seri lejon edhe pjesëmarrjen e një numri të kufizuar të femrave dhe Sherrock ishte një nga to.

Nëna e një fëmije fshiu lotët e gëzimit pas fitores së shënuar, duke i thënë tifozërisë në Londër: “Unë kam dëshmuar se mund të luajmë kundër meshkujve dhe mund të mposhtim ata”.

Duke folur të mërkurën për “Good Morning Britain”, 25-vjeçarja ka thënë se planifikon të shesë atë dërrasë fituese të pikados për të mbledhur para për Organizatën Nacionale për Autizëm, që ndihmon të përkrahet i biri i saj 5-vjeçar Rory, që ka autizëm, shkruan sot Koha Ditore.

Fallon, që deri katër vjet më parë ishte një frizere profesioniste, së pari ka nisur të luajë pikado si 17-vjeçare dhe ka një motër binjake Felicia Blay, që po ashtu luan këtë sport.