Qendra Informative dhe Kulturore e BE-së ka organizuar diskutim me shkrimtaren dhe gazetaren Majlinda Bregasi, rreth artit të të shkruarit, letërsinë e veprat e saj.

Bregasi ka thënë se është e gabuar përshtypja që shqiptarët nuk lexojnë, raporton Ekonomia Online.

“Është krijuar një përshtypje që shqiptarët nuk lexojnë, unë mendoj që lexojmë dhe jam e habitur me nivelin shumë të mirë me një grup të studenteve me të cilët kam filluar një kurs”, tha Bregasi.

Ajo tregon se profesioni i saj si shkrimtare ndikon shumë në jetën e saj personale.

“Ma kushtëzon jetën shumë, sepse kur shkruaj nuk dua të më dalin përpara shumë njerëz.  Kur shkruan prozë, është proces shumë i gjatë dhe ke nevojë për kohë dhe hapësirë vetëm për vete dhe kjo nuk është e lehtë sidomos ditën e sotme”, u shpreh Bregasi.

Shkrimtarja dhe gazetarja tregoi edhe për inspirimin që merr për të shkruar veprat e saj, derisa foli edhe për librin e saj “Ikja”

“Janë gjëra që i kemi përjetuar, parë ose lexuar, të cilët lënë përshtypje të fortë e nëse nuk e shkruan nuk mund të lirohesh. Francezët thonë shkruaj për të jetuar”.

“Në librin ‘Ikja’ është një personazh që e ka emrin Vjosa; është rritur në Shqipërinë e diktaturës, vëllai i saj e ka emrin Guri, dhe është i dashuruar me një vajzë nga Kosova, e cila studion në Tiranë. Ajo humb jetën nga një plumb qorr dhe Guri vjen në UÇK për t’u hakmarrë për dashurinë. Pastaj vjen lajmi që Guri është zhdukur dhe Vjosa vjen në Kosovë për ta kërkuar të vëllanë dhe kështu vazhdon libri”, tha ajo.

Majlinda Bregasi ka paralajmëruar se së shpejti do të vijë me një roman të ri, i cili tha se “është më ndryshe” se dy romanet paraprake, por nuk dha më shumë hollësi.