Shkupi sot sërish ishte në mesin e dhjetë qyteteve më të ndotura në botë, me indeks të lartë të ndotjes prej 176 sipas të dhënave të fundit të platformës për matjen e cilësisë së ajrit “I-Q-Air”. Përqendrimi i grimcave PM 2.5 në kryeqytet është aktualisht 18 herë më i lartë se vlera e udhëzimit vjetor të cilësisë së ajrit të Organizatës Botërore të Shëndetësisë.

Ajri në Shkup vlerësohet si i dëmshëm për shëndetin dhe rekomandohet të shmanget aktiviteti fizik në natyrë, të vendoset maskë mbrojtëse jashtë dhe të mos ajroset shtëpia.
Niveli më i lartë i ndotjes është në Qendër 201, Kisela Voda 189, Novo Lisiçe 186 dhe Karposh 4 me 183. Qyteti më i ndotur në botë për momentin është Lahore në Pakistan. Pas tij në listë është kryeqyteti i Bosnje-Hercegovinës, Sarajeva, dhe në vendin e tretë Delhi i Indisë.

Përveç ndotjes së ajrit një valë e shkurtër e të ftohtit do të përfshijë Maqedoninë e Veriut këtë fundjavë. Nga Enti paralajmërojnë reshje shiu, posaçërisht të shtunën kur pritet edhe të arrijnë 20 litra për metër katror. Më ftohtë pritet të jetë të dielën në mëngjes ku temperatura do të lëviz nga -8 deri në -2 gradë celsiuz. Temperatura gjatë ditës do të lëviz prej 3 deri në 9 gradë.

“Kryesisht reshjet do të jenë në pjesët perëndimore, gjatë natës do të përhapen në zonat e tjera. Gjithashtu, gjatë natës me zbritje të masës ajrore më të ftohtë nga veriu do të fryjë erë e fortë nga veriu. Reshjet do të kalojnë në borë në vendet më të larta si dhe në ato më të ulëta, veçanërisht në zonat perëndimore dhe veriore të vendit. Siç thashë, vala do të jetë e shkurtër dhe e qëndrueshme, pasuar me reshje, në disa vende do të jetë më e bollshme. Pritet të bjerë rreth 20 litra shi për metër katror”, deklaroi Lençe Rizova, sinoptike.

Gjithashtu, sinoptikët për të hënën paralajmërojnë edhe paraqitje të mjegullës nëpër lugina e cila do të shoqërohet më temperatura më të ulëta. Ndërkohë, ne vendet malore do të paraqitet mot me diell dhe temperatura që do të mbërrijnë deri në 13 gradë. /Alsat.mk