Gjykata Themelore në Ferizaj, trupi gjykues i Departamentit për Krime të Rënda, ka shpallur aktgjykimin ndaj të pandehurit G.R, i cili në bazë të aktakuzës së Prokurorisë Speciale të Republikës së Kosovës, akuzohet se ka kryer veprën penale “krimi i organizuar” nga neni 274 paragrafi 3 lidhur me veprën penale “blerja, posedimi, shpërndarja dhe shitja e paautorizuar e narkotikëve të rrezikshëm dhe substancave psikotrope” nga neni 229 paragrafi 4 nën paragrafi 1 lidhur me paragrafin 2 të Kodit Penal të Kosovës.

Siç thuhet në njoftim, trupi gjykues pas mbajtës së shqyrtimeve gjyqësore, dëgjimit të palëve, dhe fjalëve përfundimtare të akuzuarin G.R për veprën penale krimi i organizuar nga neni 274 paragrafi 3 lidhur me veprën penale blerja, posedimi, shpërndarja dhe shitja e paautorizuar e narkotikëve të rrezikshëm dhe substancave psikotrope nga neni 229 paragrafi 4 nën paragrafi 1 lidhur me paragrafin 2 të KPK-së, e gjykoi me dënim burgimi në kohëzgjatje prej shtatë (7) vite e gjashtë (6) muaj, si dhe dënim me gjobë në shumë prej 25 000 euro, raporton Ekonomia Online.

“I pandehuri G.R, është shpall fajtor dhe është gjykuar me dënim burgimi, sepse gjatë vitit 2010 në bashkëpunim me pesë të pandehur të tjerë të gjykuar, duke vepruar si grup kriminal i strukturuar dhe organizuar, me qëllim të përfitimit të dobisë financiare, kanë kryer krim të rëndë – ofrimit të shtijës, për shitje dhe transportim të paautorizuar të narkotikëve të rrezikshëm, në atë mënyrë që i pandehuri G.R i ka organizuar të gjitha veprimet e këtij grupi, ashtu që të gjykuarit I.K i ka dhënë veturën e tij që nga shteti i Zvicrës të shkojnë në Kosovë me qëllim të blerjes së 7.5 kg narkotik të llojit heroinë dhe pastaj të njëjtën ta transportojë në shtetin zviceran”.

“Pas blerjes së kësaj substance narkotike i pandehuri I.K i gjykuar, e ka marr veturën me heroinë dhe është nisur në drejtim të Zvicrës tek i pandehuri G.R, por në Malishevë është ndalur nga policia me ç’rast pas kontrollimit nga ana e tyre është gjetur dhe konfiskuar substanca narkotike e llojit heroinë në sasinë e lartshënuar”, thuhet në njoftimin e Gjykatës Themelore të Ferizajt.

Konform nenit 367 të KPRK-së të pandehurit i vazhdohet masa e paraburgimit deri sa aktgjykimi të marr formën e prerë, por jo më gjatë se dënimi i shqiptuar me aktgjykim.

Kundër këtij aktgjykimi, palët kanë të drejtë ankese në afat prej 15 ditë nga dita e pranimit të aktgjykimit në formë të shkruar. Ankesa iu drejtohet Gjykatës së Apelit në Prishtinë përmes Gjykatës Themelore të Ferizajt.