Presidenti Joe Biden nuk pritet të emërojë të dërguar special për dialogun Kosovë-Serbi, siç kërkoi ish-zyrtari i Shtëpisë së Bardhë, republikani Richard Grenell.

Një zyrtar i Shtëpisë së Bardhë tha të hënën për gazetën The Pavlovic Today se Presidenti Biden ka “dy ambasadorë të konfirmuar në rajon, të cilët po punojnë aktivisht për këtë çështje në bashkëpunim të ngushtë me BE-në”.

The Pavlovic Today është një medium online, i cili drejtohet nga Ksenija Pavlovic, një gazetare serbo-amerikane, korrespodente e Shtëpisë së Bardhë.

Javën e kaluar, pas bisedimeve ndërmjet Kosovës dhe Serbisë në Bruksel, Richard Grenell, ish-i dërguari special për dialogun, i bëri thirrje Presidentit Biden të “përshpejtojë” dhe të emërojë një të dërguar të posaçëm për dialogun.

“Ajo që na duhet tani është diplomacia me muskuj”, tha Grenell.

Të premten e javës që shkoi, Grenell tha se është i shqetësuar nga zhvillimet në negociatat e dialogut Kosovë-Serbi.

Ai, në një video-konferencë të organizuar nga Instituti i Parë Politik Amerikan, tha se dialogu ka kollapsuar, por lavdëroi aftësitë e kryeministrit Albin Kurti në negociata, raporton Paparaci.

Sipas Grenellit, Kurti është negociator i mirë.

Por, ai fajësoi shefin e qeverisë kosovare për refuzimin e “gjithçkaje që është propozuar nga BE-ja, SHBA-ja, madje edhe Serbia”.

“Ai është një negociator i fortë, por kur i del një ide që nuk është rrugë njëkahëshe, duhet të arrijë kompromis. Kështu do ta merrte liberalizimin e vizave”, tha ai.

Duke folur për targat, Grenell tha se për tensionet në veri ishte faji i Kurtit, i cili insistoi se recorprociteti duhet të përmbushet.