Sindikata e Pavarur e RTK-së, përkatësisht Kryesia e SPRTK-së përmes një reagimi ka ngritur shqetësimin për shfrytëzimin e parasë së taksapaguesve nga Bordi i RTK-së, që sipas kësaj sindikate merr paga më të larta se transmetuesit publikë të rajonit.

Sindikata e Pavarur e RTK-së reagon ndaj pagave enorme të Bordit të RTK-së krahasuar me transmetuesit publikë të rajonit dhe më gjerë.

Reagimi i SPRTK-së:

Sipas raportit të “South East Europian Media Ovbservatory”, të publikuar më 16 dhjetor 2016, Bordi i drejtorëve të RTK-së është shumëfish më i paguar se bordet e transmetuesve publikë të Hungarisë, Sllovenisë, Kroacisë, Shqipërisë, Maqedonisë, Serbisë, Malit të Zi etj.

Bordi i RTK-së merr mbi 20 herë më shumë pagë se Bordi i Transmetuesit Publik në Slloveni.

Një anëtar në Bordin e Transmetuesit Publik në Slloveni paguhet vetëm 55 euro për takim, që mesatarisht mbahet një herë në muaj, ndërsa një anëtar i Bordit të RTK-së paguhet 1.156 euro.

Paga mujore e anëtarëve të Bordit të Transmetuesit Publik në Kroaci është 270 euro. Në vijim është tabela krahasuese.

Tabela: Shuma neto për muaj/sesion për anëtarët e Bordit

Sipas këtij raporti, Bordi i RTK-së për vitin 2014 ka shpenzuar 152 mijë euro për paga dhe meditje, madje duke tejkaluar shpenzimet e planifikuara për 110 mijë euro dhe shkelur Ligjin për menaxhimin e financave publike.

Bordi i RTK-së është i vetmi institucion publik në vendin tonë që për pagën e tij vendos vetë dhe jo ndonjë autoritet tjetër. SPRTK i bën thirrje Kuvendit të Kosovës që në kuadër te ligjit të ri për RTK të përcaktohet mënyra e financimit të organeve drejtuese të RTK-së dhe të ndërpritet keqpërdorimi i parasë publike në këtë institucion.

Kjo formë e financimit kishte filluar në kohën e udhëheqjes së Bordit nga Rrahman Paçarizi, praktikë kjo që po vazhdon të ndiqet edhe nga kryetari aktual, Ismet Bexheti.