Ministri i Mjedisit dhe Planifikimit Hapësinor, Fatmir Matoshi, ka dënuar sulmin ndaj rojeve të Parkut Kombëtar “Sharri”.

“Me shqetësim kam marrë lajmin për sulmin ndaj rojtarëve të natyrës të PK “Sharri”, J. SH dhe A. D të cilët janë sulmuar fizikisht dhe kanë marrë lëndime trupore. Duke marrë parasysh faktin që këto ditë është intensifikuar prerja ilegale e pyjeve në Parqe Kombëtare, rojet e natyrës së këtyre zonave të mbrojtura janë angazhuar maksimalisht për kontrollin e gjendjes dhe parandalimin e prerjeve dhe dëmtimit të vlerave natyrore të parqeve,” thuhet në reagimin e ministrit Matoshi, shkruan EkonomiaOnline.

Sipas tij, gjatë punës në terren rojet po përballen me probleme të natyrave të ndryshme përfshirë edhe sulmet fizike dhe gjuajtjet me armë zjarri nga grupet e dëmtuesve të pyjeve që prerjen ilegale të pyjeve dhe tregtimin e drurit e kanë shndërruar në biznes.

“Në lidhje me këto raste kërkoj nga Policia e Kosovës dhe Prokuroria e Shtetit që me prioritet të ndërmarrin të gjitha masat e nevojshme për sjelljen e këtyre personave para drejtësisë. Gjithashtu shprehim përkushtimin tonë që në një të ardhme sa ma të afërt të arrijmë që të kemi kujdes më të madh ndaj parqeve nacionale dhe punëtorët të jenë të sigurt në punë,” thuhet në reagim.

Ministri Matoshi i ka bërë thirrje të gjithë qytetarëve të Kosovës, që të mos bëjnë prerjen ilegale të pyjeve, pasi sipas tij kujdesi ndaj tyre është kujdes për gjeneratat e ardhme.

Ndaj këtij sulmi ka reaguar edhe Agjencioni për Mbrojtjen e Mjedisit të Kosovës, shkruan EO.

Rastet e fundit ishin ato të ditës së djeshme, përkatësisht sulmi ndaj rojtarëve të natyrës të PK “Sharri” në regjionin e Suharekës, Jemin Shala dhe Ali Dakaj, të cilët janë sulmuar fizikisht nga këto grupe të organizuara dhe kanë marrë lëndime trupore, dhe ai i gjuajtjes me armë zjarri në drejtim të rojeve të natyrës në regjionin e Kaçanikut.

Në lidhje me të dy rastet është informuar Policia e Kosovës dhe Prokuroria e Shtetit të cilët janë duke hetuar rastet.

Me këtë rast Agjencia për Mbrojtjen e Mjedisit të Kosovës përkatësisht Drejtoria për Administrimin e Parkut Kombëtarë “Sharri”, kërkon nga organet kompetente që me prioritet të ndërmarrin të gjitha masat e nevojshme për sjelljen e këtyre personave para drejtësisë.

Gjithashtu kërkohet që të ndërmerren masat e nevojshme për parandalimin e rasteve të tilla dhe ofrimin e sigurisë së nevojshme për rojtarët e natyrës.

Njëkohësisht kërkohet nga institucionet përgjegjëse të Qeverisë së Kosovës, që me qëllim të ruajtjes së resurseve të Parqeve Kombëtare të cilat janë shpallur me ligj të veçantë për mbrojtjen e këtyre vlerave të rralla të natyrës, të shikojnë mundësinë e rritjes së numrit të rojeve të natyrës, pajisjen e tyre ma armë dhe kompensimin e rrezikshmërisë në punë.