Gjykata Supreme ka miratuar ankesën e Lëvizjes për numërimin e 4 mijë e 639 votave të ardhura nga diaspora të pranuara në Komisionin Qendror të Zgjedhjeve nga data 08.10.2019 deri më datë 11.10.2019.

Kështu ka bërë të ditur përfaqësuesi i VV-së në KQZ, Adnan Rrustemi.

“Gjykata Supreme miraton ankesën e Lëvizjes për numërimin e votave të mërgatës.Mijëra fletëvotime të bashkatdhetarëve të mbajtura të bllokuara do të numërohen”, ka shkruar ai në profilin e tij në Facebook, transmeton Telegrafi. Në vendimin që e ka postuar Rrustemi në Facebook thuhet se “Gjykata Supreme konsideron se vendimi i Panelit Zgjedhor për Ankesa dhe Parashtresa (PZAP) duhet të anulohet, duke e kthyer çështjen në rivendosje”.

“PZAP është i detyruar që në rishqyrtim të çështjes t’i mënjanojë të metat e lartpërmendura e pastaj të marrë një vendim të drejtë dhe të ligjshëm”, thuhet në njoftim.