Komuna e Prishtinës ka promovuar produktin vendor që pastron ajrin e qytetit. Ky produkt quhet “TE Pema T” dhe është realizuar nga studentët e Inxhinierisë së Ambinetit dhe Mekatronikës, me mbështetje të Komunës së Prishtinës dhe UNICEF Innovation Lab Kosova.

Këtë e ka bërë të ditur kryetari i Komunës së Prishtinës, Shpend Ahmeti, përmes një postimi në rrjetin social “Facebook”.

“Sot promovuam produktin “TE Pema T”, produkt ky i realizuar nga studentët e Inxhinierisë së Ambinetit dhe Mekatronikës, me mbështetje të Komunës së Prishtinës dhe UNICEF Innovation Lab Kosova. Të gjitha pjesët përbërëse të këtij produkti, janë vendore.

“TE Pema T” është i mbushur me bimë që kanë aftësi shumë të mëdha të filtrimit të ajrit dhe prodhimit të oksigjenit. Kjo është e mundur falë renditjes, pozitës dhe sistemit automatik të ujitjes i cili bën që bimët të filtrojnë ajrin me kapacitet maksimal.

Produkte të tilla janë të mirëseardhura në Prishtinë, kur dihet problemi i shpeshtë që kemi me ndotjen e ajrit. Efekti që ka “TE Pema T” në pastrimin e ajrit, është i barabartë me efektin që mund të kenë 70 fidane të mbjella në Prishtinë”, ka shkruar Ahmeti.