Punonjësit, Menaxhmenti dhe Bordi i Përkohshëm i Drejtorëve të Telekomit të Kosovës përmes një letre publike drejtuar organeve të larta të shtetit kërkojnë që urgjentisht të bëhet një zgjidhje për Telekomin në mënyrë që të shpëtohet kjo ndërmarrje.

Telekomi paralajmëron se situata krijuar mund të rezultojë me ndërprerjen e funksioneve të Telekomit të Kosovës për shkak të pamundësisë për të operuar dhe funksionuar në kushtet e tanishme të bllokimit të llogarive bankare.

Letra e plotë:

Letër publike drejtuar organeve shtetërore dhe institucioneve të Republikës së Kosovës

Punonjësit, Menaxhmenti dhe Bordi i Përkohshëm i Drejtorëve të Telekomit të Kosovës, përmes kësaj letre publike, iu drejtohet organeve të larta shtetërore dhe të gjitha institucioneve të Republikës së Kosovës, lidhur me pasqyrimin e gjendjes tejet kritike dhe emergjente të krijuar pas bllokimit dhe tërheqjes së mjeteve nga llogaritë bankare.

Dëshirojmë që të informojmë me saktësi të gjithë akterët dhe drejtuesit shtetërorë mbi situatën reale që po zhvillohet nëTelekomin e Kosovës, përkitazi me momentin e ndjeshëm të kërcënimit dhe rrezikimit potencial të vijimësisë së ofrimit të pandërprerë të shërbimeve të komunikimeve elektronike për të gjitha institucionet e Republikës së Kosovës si dhe subjektet e tjera që përdorin shërbimet telekomunikuese, situatë e cila është krijuar pas bllokimit të llogarive bankare.

Vazhdimi i kësaj gjendje të rënduar në Telekomin e Kosovësduke i shtuar edhe situatën e pandemisë së Covid-19, në çdo moment mund të shkaktojë rrethanën e padëshiruar të një dëmi të pariparueshëm për organet dhe institucionet e Republikës së Kosovës, duke përfshirë institucionet e sigurisë së lartë nacionale, të atyre emergjente, shëndetësore si dhe të një varg institucione dhe subjekte tjera, ngase kjo situatë mund të rezultojë me ndërprerjen e funksioneve të Telekomit të Kosovës për shkak të pamundësisë për të operuar dhe funksionuar në kushtet e tanishme të bllokimit të llogarive bankare.

Andaj, ftojmë institucionet përgjegjëse shtetërore, që sa më parë, të punojnë në ofrimin e zgjidhjes së kësaj situate të ndjeshme dhe në përkrahje dhe shpëtimin e ndërmarrjes shtetërore me interes vital, strategjik, ekonomik e social.