Milot Rashica ka bërë debutimin e tij në Bundesliga me skuadrën e re Werder Bremen në fitoren 2-1 ndaj Schalkes në udhëtim.

Sulmuesi i talentuar nga Kosova e nisi ndeshje nga minuta e parë për tu zëvendësuar pastaj në pjesën e dytë.

Edhe pse nuk arriti të shënonte apo asistonte, me paraqitjen e tij kanë mbetur të kënaqur te Bremeni.

Trajneri i Werder Bremen, Florian Kohfeldt tha se Rashica ka luftuar dhe ndihmuar ekipin sa ishte në fushë.

“Rashica në tri ose katër raste ka treguar se është lojtar i mirë. Ai ka luftuar dhe e ka ndihmuar skuadrën drejt fitores”, ka thënë trajneri i Bremenit, Florian Kohfeldt.

E fjalë të mira për reprezentuesin e Kosovës ka folur edhe kapiteni i Werderit, Max Kruse.

Sipas ish-reprezentuesit gjerman atij i duhet ende kohë për tu përshtatur me pjesën tjetër të skuadrës.

“Rashica është me ne vetëm që tri ditë dhe u pa qartë që ende na duhet kohë për tu përshtatur”.

“Në ndeshjen ndaj Schalkes e kemi parë se ai ka cilësi të mëdha dhe do të na ndihmojë në vazhdim”, tha Kruse.

Werder arriti një fitore tejet të rëndësishme në udhëtim te Schalke 1-2 dhe i iku fundit të tabelës në Bundesliga.