Sot u mbajt takimi i rregullt i Këshillit Kombëtar të Investimeve të cilin e udhëhoqën zëvendësministrja e Integrimit Evropian, Anila Statovci Demaj dhe Ministri i Financave, Avdullah Hoti.

Ky ishte takimi i gjashtë i këtij Këshilli që nga themelimi i tij në korrik të vitit 2015. Të pranishëm ishin Ministrat e Republikës së Kosovës, anëtarë të Këshillit, përfaqësuesit e Ambasadave në Kosovë dhe përfaqësuesit e donatorëve.

Udhëheqësja e Ministrisë së Integrimeve, zëvendësministrja, Statovci Demaj paraqiti para Këshillit, dy pikat e rendit të ditës për aprovim: Përmirësimin e gjendjes infrastrukturore në kuadër të Shërbimit Spitalor Klinik Universitar të Kosovës, si dhe ndërtimin e Stadiumit Nacional të Futbollit në Kosovë.

Të dy këto pika, pas prezantimit të projekteve nga Ministrat respektiv, u miratuan nga unanimisht nga Këshilli Kombëtar i Investimeve.

Në fund, Këshilli Kombëtar për Investime u njoftua për raundin e ardhshëm të Kornizës Investuese për Ballkanin Perëndimor, dhe për këtë në Ministrinë e Integrimit Evropian kanë ardhur dy kërkesa, Studimi i Fizibilitetit për linjën hekurudhore Prishtinë-Aeroporti i Prishtinës dhe Studimi i Parafizibilitetit për Programin e Banimit Social në Kosovë.