Prokuroria Themelore në Gjilan, Departamenti i Përgjithshëm, ka ngritur të premten  aktakuzë ndaj Granit Lekës, pronar i kompanisë Vol Travel” nga Gjilani, ku ky i fundit gjatë sezonit të verës disa qytetarëve ua ka marrë paratë për aranzhime turistike në Turqi, por në momentet e fundit, pasi që ata kanë shkuar në Aeroport, e kanë kuptuar se kanë rëne pre e një kompanie mashtruese, pasi që nuk kanë mundur të udhëtojnë drejt destinacionit të paraparë.

Në njoftimin e Prokurorisë thuhet se aktakuza ndaj G. L. është ngritur për shkak të veprës penale “Mashtrimi”. “Prokuroria njofton përmes një komunikate se, sipas aktakuzës, në kohë të papërcaktuar deri në fillim të muajit gusht të vitit 2018, në Gjilan, i pandehuri G. L. si pronar i një agjencie turistike, me qëllim të përfitimit të kundërligjshëm të dobisë pasurore për vete ose për personin tjetër, ka mashtruar 50 (pesëdhjetë) klientë të dëmtuar duke u ofruar bileta fiktive për pushime në Turqi, me të cilat nuk kanë pasur mundësi të udhëtonin, me ç’rast të njëjtëve u ka shkaktuar dëm material në vlerë prej 123.859.00 eurosh”, thuhet në njoftimin e Prokurorisë Themelore në Gjilan.