Kompania “Uber” befasoi botën, muajin e kaluar, kur lajmëroi planet e saj mbi testimin e makinave vetë-drejtuese.

Ndërkohë, kryetari i produkteve të “Uber”, Jeff Holden, foli fundjavën e kaluar mbi planet e kompanisë për ndërtimin e disa aeroplanëve të vegjël që realizojnë ulje dhe ngritje vertikale, kështu që mund të përdoren brenda qytetit.

Holden tha se ideja e këtij programi u mendua që të mund t’i ofronte përdorueseve “sa më shumë opsione të mundshme për të lëvizur.” Ai beson se pajisjet fluturuese të quajtura VTOL do të bëhen realitet brenda më pak se një dekade.

Kjo, thotë ai, do të jetë një mënyrë e zgjuar për të shmangur trafiqet e mëdha. Ato nuk kanë nevojë për një pistë të gjatë për tu ngritur, ashtu si aeroplanët tradicionalë, por gjithsesi kanë nevojë për një sipërfaqe të mjaftueshme për të realizuar një ulje të sigurt, dhe kjo është e vështirë për një qytet të mbipopulluar.

Uber nuk është kompania e vetme që po mendon mbi këtë projekt. Kompani të tjera si DARPA (Defense Advanced Research Projects Agency) po punon aktualisht mbi ndërtimin e një aeroplani eksperimental që mund të shërbejë si taksi për njerëzit dhe ngarkesat brenda një qyteti.

Në Shkurt, CEO i Tesla-a Elon Musk tha se kishte një ide mbi ndërtimin e mjeteve fluturuese që ngrihen dhe ulen vertikalisht.