Të dhënat e reja nga Ministria e Shëndetësisë në Izrael sugjerojnë se vaksinat kundër coronavirusit nga Pfizer dhe Moderna, mund të jenë më efektive nga sa mendohej.

Sipas CNN, përcjell Telegrafi, të dhënat që monitoruan më shumë se 700 mijë njerëz të vaksinuar plotësisht në Izrael, zbuluan se vetëm një përqindje e vogël e njerëzve u infektuan me COVID-19, bazuar në deklaratën e kreut të Ministrisë së Shëndetësisë, Sharon Alroy Preis.

Vaksina më së shumti që u përdor në Izrael është ajo e Pfizer-BioNTech, derisa është përdorur një numër i vogël i dozave nga Moderna. Të dyja vaksinat përdorin të njëjtën teknologji dhe në provat klinike rezultuan rreth 95 për qind efektive.

Izraeli filloi fushatën e tij të vaksinimit më 20 dhjetor. Të dhënat e lëshuara të enjten monitoruan 715,425 të cilët kishin kaluar të paktën një javë pas dozës së dytë; duke i dhënë kështu kohë vaksinave për të siguruar imunitetin.

Nga ata njerëz, vetëm 317 u sëmurën me COVID-19 dhe 16 u shtruan në spital.

Të dhënat iu referuan mostrave me më shumë njerëz nga se ishin në provat klinike të Pfizer dhe Moderna-s në fazën e tretë. Përafërsisht 75 mijë njerëz morën pjesë në ato prova, derisa gjysma morën vaksinën dhe gjysma tjetër placebo.