Në Dhomat e Specializuara të Kosovës (DhSK) në Hagë, të hënën (24 mars) ka vazhduar gjykimi ndaj Hashim Thaçit, Kadri Veselit, Rexhep Selimit dhe Jakup Krasniqit.

Së bashku me të akuzuarit e tjerë, edhe Thaçi është prezent në sallën e gjyqit për të ndjekur dëshminë e dëshmitarit 124-të të Zyrës së Prokurorit të Specializuar (ZPS), raporton “Betimi për Drejtësi“.

Fillimisht, kryetari i trupit gjykues Charles Smith III dha urdhër për pranimin e audio-incizimeve të deklaratave të dëshmitarit 04264. Sipas tij, në kërkesën e ZPS-së, nuk ishte përgjigjur mbrojtja.

Ndërsa për disa parashtrime të ekipit mbrojtës të Thaçit, u kalua në seancë private për publikun.

Ndryshe, Thaçi javën e kaluar ishte për vizitë në Kosovë ku edhe vizitoi varrin e babait të ndjerë, për të cilin ishte në një vizitë tjetër disaorëshe përpara se të vdiste.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.  

Më 29 prill 2022, Zyra e Prokurorit  të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep SelimitdheJakup Krasniqit është konfirmuar më 26 tetor 2020.