Kryetari i Kuvendit të Kosovës, Kadri Veseli, ka folur sot pasdite për moslejimin e zyrtarëve të lartë të Serbisë të cilët kanë provuar të hynë në territorin e Kosovës pa leje, edhe përkundër refuzimit që i kanë bërë autoritetet kosovare.

Duke komentuar provokimet e Serbisë, Veseli tha se Serbia duhet ta kuptoj se Kosova si shtet i pavarur dhe sovran ka zot shtëpie nuk lejon të provokohet nga askush.

“Nuk na duhen provokime të tilla. Serbia duhet të kuptojë se ky vend ka zot, në lindje, në perëndim, veri e në jug. Kosova është shtet i pavarur dhe sovran. Ne nuk jemi duke shkuar në Serbi të provokojmë, presim që ata të jenë më të vëmendshëm në respektimin e sovranitetit të kufijve tanë territorialë, në të njëjtën kohë do të ballafaqohen me veprime të tilla të cilat janë legjitime të institucioneve tona. Për aq sa ata janë korrekt ne do të jemi korrekt. Kjo është ajo që do doja të përsëritja si mesazh, mos të kemi provokime, nuk na është dashtë dita e sotme, ata duhet ta kuptojnë se në Kosovë nuk mund të vijnë kur të donë”, ka thënë kryeparlamentari Veseli për Ekonomia Online.

Këto deklarata të kryeparlamentarit kosovar Kadri Veseli vijnë pas ndalimit të hyrjes në Kosovë të të ashtuquajturit drejtor i Zyrës për Kosovën, Marko Gjuriq dhe ministrit të Mbrojtjes, Aleksander Vulin.

Pas miratimit të demarkacionit nga Kuvendi i Kosovës, të dy këta zyrtarë serbë kanë bërë deklarata që nxisin urrejtje dhe dhunë në Kosovë, ndërsa kanë reaguar edhe pas deklaratave të kryeparlamentarit Kadri Veseli i cili ka thënë se Kosova mund ta marrë Luginën e Preshevës por nuk ka marrë Luginën e Preshevës por nuk ka çfarë të japë.