Gjatë gjashtë muajve të parë të këtij viti institucionet të cilat marrin para nga buxheti i shtetit kanë shpenzuar hiç më pak se  834 milionë euro dhe pjesa dërrmuese është shpenzuar për paga dhe për transferime sociale.

Duke u bazuar në raportin gjashtëmujor të Ministrisë së Financave shihet se gjatë gjysmës së parë të vitit, në kategorinë buxhetore, të identifikuar në raport për paga dhe rroga janë shpenzuar 293 milionë e 820 mijë euro.

Nga kjo shumë vetëm për paga janë shpenzuar 248 milionë euro, për pagesa për sindikatë janë shpenzuar 860 mijë euro, 9000 euro për anëtarësimin e Odës së Infermierëve të Kosovës, 6000 euro për anëtarësimin e Odës së Mjekëve të Kosovës, 16 milionë euro janë ndalesa në të ardhura personale derisa rreth 28 milionë euro janë pagesa të kontributeve pensionale nga punëdhënësi e nga punëmarrësi, si dhe 260 mijë euro për pagesa për vendime gjyqësore.