Vizita e parë në Kosovë e Jack Smith, Kryeprokurorit të Specializuar të Gjykatës Speciale, është bërë pa dijeninë e avokatëve të akredituar për Dhomat e Specializuara.
Kështu ka bërë të ditur për klankosova.tv, avokati Tahir Rrecaj i cili tha se vizita e Jack Smith mund të jetë sinjal se Gjykata Speciale është afër nisjes së procesit të saj.
”Ne, mbrojtësit e akredituar në Gjykatën Speciale, nuk kemi pasur asnjë informacion për një vizitë të tillë të z. Smith”, thotë ai, njofton Klan Kosova.
Avokati Tahir Rrecaj i cili është i akredituar për të qenë pjesë e punës profesionale në Gjykatën Speciale ka theksuar po ashtu se deri tani gjithçka është gati për të filluar me shqyrtimin e aktakuzave të para, njofton Klan Kosova.
”Është vizita e parë e tij në Kosovë, pas emërimit të tij si Prokuror i Dhomave të Specializuara. Por sigurisht kjo mund të jetë edhe një sinjal që Gjykata Speciale së shpejti do të fillojë me shqyrtimin e aktakuzave të para, kundër personave që pretendohet se kanë kryer krime lufte”.
”Nuk ka asnjë pengesë eventuale për funksionalizimin e kësaj Gjykate. Është bërë emërimi i gjyqtarëve, prokurorëve, janë akredituar avokatët e specializuar”, përfundon ai, njofton Klan Kosova.
