Lëvizja Vetëvendosje (VV) ka mbajtur konferencë për medie ku ka akuzuar komunën e Prishtinës, se ka keqmenaxhuar me qumështin e shpërndarë si shujtë për klasat prej 1 deri në 5, raporton Ekonomia Online.

Asamblisti i VV-së, Eman Rrahmani, tha se komuna e Prishtinës së bashku me “Devolli Group” kanë bërë një marrëveshje për shpërndarjen e qumështit Vita, ku tenderin e kishe fituar kompania Devolli e që komunës së Prishtinës ky tender i ka kushtuar 730 mijë euro, ndërsa tenderi paraprak 200 mijë.

“Në periudhën 2014-2015, në tenderin për qumësht për klasat e I-V, oferta për një qumësht të vogël ka qenë 10 cent. Fitues i këtij tenderi ka qenë “Devolli Group” Sh.P.K, me qumështin VITA dhe vlera e përgjithshme e kontratës ka qenë 200.000 euro. Për vitin 2018, i njëjti tender me të njëjtin numër të njësive, për të njëjtin numër të nxënësve i ka kushtuar Komunës 733,698.00 euro. Për të njëjtat pecifikacione, i njëjti paketim dhe e njëjta kompani prodhuese, pra qumështi VITA nga “Devolli group” Sh.P.K. Vetëm se kompania prodhuese nuk ka marrë fare pjesë, edhe pse ka qenë përfituese e tenderit të parë”.

“Kjo është rrjedha e ngjarjeve me të cilën është dëmtuar buxheti i Komunës, pra paratë e qytetarëve për 530.000 euro:

– Tenderi paraprak në periudhën 2014-2015 ka qenë me vlerën 200.000 euro;
– Në shpalljen e tenderit për vitin 2018, vlera e parashikuar e tenderit është bërë 730.000 euro pa asnjë studim apo analizë. D.m.th 530.000 euro më shumë;
– Edhe pse si kompania më e lirë nga tenderi i parë, kompania prodhuese nuk merr fare pjesë në tender;
– Tenderin e fiton kompania “Arbazen” LTD me vendodhje në Maltë, vend i cili njihet si një nga parajsat fiskale;
– Nga të dhënat në ARBK shihet qartë që kjo kompani është e lidhur direkt me kompaninë prodhuese “Devolli Group” Shpk;
– Edhe pse në mes të dy tenderëve në fjalë, TVSh për qumështin është zvogëluar, oferta e kësaj kompanie dyfishohet në 19.4 cent;
– Zyrtarët Komunal në vend që të bëjnë rrumbullaksimin në vlerën më të vogël, pra në 19 cent, vlera rrumbullaksohet në 20 cent;
– Si përfundim kemi dëmtim të buxhetit të Komunës prej 530,698 eurove”.

Rrahmani tha se kjo rritje e vlerës së tenderit, marrëveshje ndërmjet komunës së Prishtinës dhe kompanisë Devolli e ka dëmtuar komunën në humbje të 530 mijë euro, raporton EO.

“Ani pse kryetari Ahmeti ka thënë se “ai nuk mund t’i tregoj asnjë kompanie se me çfarë çmimi duhet të konkurrojë”, me këtë skemë dhe me parashikimin e buxhetit prej 730.000 euro veç kanë treguar, apo më mirë të themi kanë paracaktuar se cila kompani dhe me çfarë çmimi të marrin pjesë”.

“Prandaj i bëjmë thirrje, organeve hetuese dhe prokurorisë që sa më shpejtë të merren me këtë çështje dhe te hetohet deri në fund dhe të kërkoj përgjigje në disa pyetje: Cilat janë arsyet se kompania prodhuese edhe pse fituese e tenderit të parë, nuk merr pjesë në këtë tender, por merr pjesë një “satelit” i tyre nga Malta? Cilat janë lidhjet e “Devolli group” Sh.P.K. me kompaninë fituese nga MALTA në tenderin e fundit? Pse për vitin 2018 vlera e parashikuar e tenderit nga zyrtarët komunal bëhet 730.000 edhe pse tenderi paraprak ka qenë 200.000 euro? Në çfarë është bazuar ky parashikim? Pse vlera për njësi është rritur 100% ? Pse rrumbullaksimi i çmimit për njësi është bërë në dëm të buxhetit të qytetarëve?”.

“Besojmë se përgjigjet në këto pyetje, do ta vërtetojnë se fituesi është ditur akoma pa aplikuar. Bile edhe çmimi. Sa më shpejt të nisë hetimi do të pamundësoj që ky kryetar të vazhdoj keqmenaxhimin potencial edhe ne tendere të tjerë. Kjo është mjaft e rëndësishme marrë parasysh se vetëm nga ky tender për shkak te këtij keqmenaxhimi nga zyrtarët komunal është dëmtuar dëmtuar buxheti i qytetarëve të Prishtinës për mbi 500 mijë euro”.