Deputeti i Lëvizjes Vetëvendosje, Visar Ymeri ka bërë me dije se aktgjykimi i Gjykatës Themelore ku aktivistët e partisë së tij janë dënuar me 21 vite burg, është anuluar dhe procesi është kthyer në rigjykim.

Sipas tij, kjo nënkupton se procesi nuk ka pasur asnjë mbështetje në prova dhe se aktivistët janë mbajtur në burg pa faj, transmeton Indeksonline.

Ymeri ka kujtuar vdekjen e Astrit Deharit duke thënë se po të mos ishte mbajtur pafajësisht në burg, ai sot do të ishte duke festuar ditëlindjen e tij të 28-të.

Ky është komenti i plotë i Ymerit:

Frashëri, Atdheu e Egzoni u liruan sot nga burgu. Ndërkohë që aktgjykimi i gjykatës themelore që i kishte dënuar këta dhe Adean me 21 vite e gjysmë burg u anuluar dhe procesi është kthyer në rigjykim.
Që do të thotë që procesi nuk ka pasur bazë ligjore e as mbështetje në prova a dëshmi.
Që do të thotë që këta janë mbajtur në burg pa pas kurrfarë faji.
Që do të thotë se janë arrestuar pa pasur asnjë dëshmi a provë.
Pra që janë arrestuar pa faj.
Janë mbajtuar në burg pa faj.
Këta katër dhe Astriti.
Po të mos ishte mbajtur pafajësisht në burg, sot Astriti do ta festonte ditëlindjen e 28-të.
Për këtë rast të montuar e për Astritin pushteti ka përgjegjësi. Dhe për këtë duhet të jap përgjegjësi.