Në qendrën “Austria Center” në Vjenë ku çdo ditë shkojnë mijëra njerëz që të marrin vaksinën kundër coronavirusit, policia ka zbuluar një mashtrim të mirë organizuar.

Kundërshtarët e vaksinimit në këtë qendër i ishte mundësuar që pa marrë vaksinën të marrin certifikatat për vaksinim.

“Një numër i ‘deleve të zeza’ tentuan të pasurohen me certifikata të falsifikuara për vaksinim për kundërshtarët e vaksinimit – duke lëshuar certifikata të rrejshme për vaksinim. Bëhet fjalë për një mashtrim të mirë organizuar. Fillimisht morën para nga persona të caktuar, të cilët më vonë pa dhënë kurrfarë vaksine – i futën në sistem si persona të imunizuar”, pretendojnë në “Austria Center”.

Në këtë mashtrim ishin përfshirë disa persona që punonin në “stacione” të ndryshme gjatë procesit të vaksinimit, ka bërë të ditur organizata “Samariterbund”.

Në kabina të veçanta në certifikatat e vaksinimit janë vendosur vulat me konfirmim për vaksinim. Ky rast është zbuluar pasi që te një prej administratorëve u zbulua një numër i madh i vaksinave.

Në mesin e të dyshuarve nuk ka mjekë, e mashtruesit që u zbuluan kanë dhënë dorëheqje dhe ndaj tyre edhe ngritur padi.

Në “Austria Center” janë ndërmarrë masa shtesë të sigurisë, që probleme të ngjashme të mos përsëriten. Mjekja Ivet Zakarian tha për “Kronen Zeitung”, se ishte dëshmitare sesi një pjesëtar i sigurimit mori vulën dhe vulosi një certifikatë si dëshmi për vaksinim.

Madje ajo pranoi se ka pasur probleme sa i përket vjedhjeve se vulave të mjekëve, që “zhdukeshin” sa herë që mjekët dilnin në pauzën e drekës.

E pikërisht për këtë ka filluar të aplikohet një sistem i ri, ku çdo ditë vulat numërohen dhe i jepen mjekëve pasi të nënshkruajnë një dokument dhe gjatë çdo pauze dorëzohen në vende të caktuara ku ruhen mirë.