Të premten është mbajtur tubim përkujtimor në Gradicë me rastin e shënimit të 20 vjetorit të rënies heroike të dëshmorit të Kombit, Dr.Lec Gradica, ku edhe është zbuluar pllaka në Odën e familjes Leci, ku edhe filloi gurëthemeli i Parë i Spitalit Ushtarak i Brigadës 144-të të UÇK-së, njëherit ne këtë manifestim familja e doktor Lec Gradicës është dekoruar me medaljen Heroi i Kosovës nga Presidenti i Republikës së Kosovës, Hashim Thaçi.

Tubimi është mbajtur nën patronatin e Kryetarit të Kuvendit të Republikës së Kosovës, Kadri Veseli, ndërsa merrnin pjesë, kryetari i Kuvendit, Kadri Veseli, këshilltari i Presidentit Thaçi, Ismail Syla, kryetari i Komunës, Ramiz Lladrovci, përfaqësues të institucioneve lokale e qendrore, familjarë, përfaqësues të shoqatave të dala nga lufta dhe shumë qytetarë.

Me këtë rast, kryetari i Komunës së Drenasit, Ramiz Lladrovci, ka vlerësuar lartë punën dhe veprimtarin e doktor Lec Gradicës. “Doktor Leci edukimin e tij e zbatoi më së miri, duke i ndihmuar UÇK-së, por edhe përtej saj. Ai ishte një shërues i plagëve të luftës, si për ushtarët, ashtu edhe popullatën, por ju bashkua edhe me pushkë ushtarëve, lavdi jetës dhe veprës së tij”, ka thënë kryetari Lladrovci.

Kryetari i Kuvendit të Republikës së Kosovës, Kadri Veseli ka thënë se Leci ishte mjeku i plagëve të lirisë. “Doktor Lec Gradica ishte ndër të parët që iu përgjigj thirrjes për liri, duke u bërë kështu mjeku i plagëve të lirisë dhe në fund, dëshmor i saj.  Gradica është vendlindja e Tahir Gradicës, që mbrojti nderin e vajzave të Drenicës nga Jashar Pasha, është vendlindja e Lec Gradicës, trimit që luftoi kundër serbëve e bullgarëve, bashkë me Azem Bejten, është vendlindja e Mehmet Gradicës, prijësit të luftës së Drenicës kundër komunizmit.  Është vendlindja e djaloshit trim Rrustem Gradicës, që ra heroikisht në vitet e rënda të Rankoviqit. Është vendlindja e dëshmorëve të UÇK-së, vëllezërve Fazliu, Asllanit, Mehdiut, Milazimit, është vendlindja e doktor Lecit, mjekut legjendat të Ushtrisë Çlirimtare të Kosovës”, ka thënë kryeparlamentari Veseli.

Në emër të presidentit Hashim Thaçi, foli këshilltari i tij, Ismajl Syla, i cili tha se Lec Gradica kishte qenë vlerë e një njeriu modest. “Doktor Leci ka qenë vlerë, ka qenë trashëgimtar i një familje shumë të respektuar, ka qenë një njeri modest dhe prandaj vlerat e tij nuk mund të shuhen. Margatirarit thuhet mund t’i dridhet balta, por atij i hiqet balta dhe shkëlqen. Sot kam nderin që në emër të Presidentit Thaçi të jap familjes së doktorit, Urdhrin “Heroi i Kosovës”, ka thënë Syla.

Bashkëluftëtari i doktor Lecit, Naim Bardiqi, tha se është e vështirë të përshkruhet vepra e tij. “Ka qenë dhe mbetet një nga figurat më emblematike të UÇK-së, i cili me veprimtarinë e tij, intelektin, dijen që ka pasur dhe tërë pasurinë e familjes, bashkë me bashkëshorten, iu vunë atdheut në shërbim, duke sakrifikuar edhe jetën e tij, duke u bërë shembull për të gjitha gjeneratat qe do të vijnë pas”, ka thënë Bardiqi.

Vajza e Doktor Lec Gradicës, Lavdije Leci ka përshëndetur të pranishmit dhe ka thënë se ndihet krenare kur e kujton se sa jetë ka shpëtuar babai i saj. Ajo tregoi se gjatë luftës shumë pak e kishte parë babain e saj, teksa ai po merrej me të plagosurit, dhe tha se ai ka mësuar atdhedashurinë. “Babai më ka mësuar se si ta dua vendin tim edhe si t’i ndihmoj njerëzve në nevojë. Ai kishte një humanizëm të paepur edhe një atdhedashuri të trashëguar, sepse ai ishte i vetëdijshëm se si fitohet liria”, ka thënë doktoresha Lavdije Leci, e bija e doktor Lec Gradicës.

Kurse historiani Besim Morina, foli për shkollimin e doktor Lecit dhe tha se ai kishte bërë vizita të shumta mjekësore edhe për familjet ne nevojë. Morina shtoj se doktor Leci është shembull se si duhet mbajtur betimi i Hipokratit.