Këshilli Nacional për Shëndet dhe Siguri në Punë, i cili kryesohet nga zëvendësministri i Punës dhe Mirëqenies Sociale, Qerkin Dukolli, me bashkëpunëtorët vizitoi sot Institutin e Mjekësisë së Punës në Obiliq dhe Qendrën Kombëtare të Mjekësisë së Punës në Gjakovë.

Në këtë vizitë me karakter njohës, zëvendësministri Dukolli është pritur nga drejtori i Institutit në Obiliq, Dr. Rexhep Kaqurri dhe Dr. Luan Nagavci, drejtor i Qendrës Kombëtare të Mjekësisë së Punës në Gjakovë.

Zëvendësministri Dukolli, në cilësinë e kryesuesit të Këshillit Nacional për Shëndet dhe Siguri në Punë, u njoftua nga afër me punën, kushtet dhe shërbimet që ofrojnë institutet e mjekësisë së punës në Obiliq dhe Gjakovë. Ai u shpreh i kënaqur me punën, shërbimet dhe produktet që këto dy institute ofrojnë për qytetarët. Me këtë rast ai tha se Ministria e Punës dh Mirëqenies Sociale do të jetë çdo herë afër dhe e gatshme që të ndihmojë këto institucione, të cilat janë shumë të rëndësishme në ofrimin e shërbimeve të specializuara për të punësuarit e sektorit publik dhe atij privat.

Drejtuesit e këtyre instituteve, Dr. Kaqurri dhe Dr. Nagavci falënderuan zëvendësministrin Dukolli për vizitën dhe gatishmërinë e tij bashkëpunim dhe përkrahjen institucionale për institucionet e mjekësisë së punës.