Analistët politikë në Shqipëri ndajnë mendime të ndryshme sa i përket procesit zgjedhor në Kosovë dhe ndikimit të tyre në Shqipëri.

Andi Bejtja thotë se rezultati i zgjedhjeve parlamentare në Kosovë mund të ketë njëfarë ndikimi edhe në Shqipëri.

“Është mirë që forcat e reja të fitojnë në Kosovë në mënyrë që ti japin fund njëlloj tranzicioni të së vjetrës dhe në këtë mënyrë të ndikojnë edhe në Shqipëri. Do të ishte mirë që të kemi lider që të ndikojnë sa më pak për keq në Shqipëri dhe anasjelltas. Në këto vite partneritetet e liderëve të Kosovës dhe Shqipërisë në shumë raste ka qenë i dëmshëm dhe i rrezikshëm. Pra liderët sa më pak ndërhyrje që bëjnë te njëri tjetri, aq më mirë është”, deklaroi Andi Bejtja për RTV Dukagjinin.

Në anën tjetër njohësi i çështjeve politike Ben Andoni thotë se Shqipëria është jashtëzakonisht indiferente në lidhje me zgjedhjet në Kosovë, përcjell Telegrafi.

“Shqipëria është jashtëzakonisht indiferente në lidhje me zgjedhjet në Kosovë pasi peizazhi politik i Kosovës nuk luan asnjë rol në politikën në Shqipëri…Kalimi i kohëve po tregon një ftohje të mëtejshme të raporteve mes Shqipërisë dhe Kosovës edhe për shkak të raporteve që kanë personalitetet e Kosovës me Kryeministrin aktual të Shqipërisë dhe po ashtu me Presidentin aktual të Shqipërisë”, deklaroi Ben Andoni.

Projekti i Mini-Schengenit Ballkanik ka qenë ndër temat që ka përplasur vazhdimisht krerët e Kosovës me kryeministrin e Shqipërisë, Edi Rama.