Presidenti i Serbisë, Aleksander Vuçiq, ka zhvilluar një bisedë telefonike me Sekretarin e Përgjithshëm të NATO-s, Jens Stoltenberg.

Mediat serbe raportojnë se temë diskutimi e kësaj bisede kanë qenë zhvillimet në veri të Kosovës, transmeton Klankosova.tv.

Vuçiq ka theksuar se “Serbia nuk ka shkelur Marrëveshjen e Brukselit ose Rezolutën 1244 dhe as nuk e rrezikoi në asnjë mënyrë ruajtjen e paqes”.

“Pushtimi i plotë me automjete të blinduara në veri të Kosovës i cili po kryhet nga Prishtina, ka vazhduar për shtatë ditë dhe të gjithë në bashkësinë ndërkombëtare heshtin me zë të lartë”.

Temë diskutimi ishin edhe helikopterët dhe aeroplanët e paidentifikuar që janë parë kohë pas kohë tash e disa ditë në pikëkalimet kufitare Jarinjë dhe Bërnjak.

“Befas shqetësohen kur shohin helikopterë dhe aeroplanë serbë në ‘territorin e Serbisë qendrore’, sepse mendojnë se ata nuk duhet të ekzistojnë, ose nuk duhet të ngrihen derisa Kurti ose dikush nga bashkësia ndërkombëtare të miratojë atë”, ka thënë Vuçiq.