Ekipi shqiptar i kërkim-shpëtimit që i erdhi në ndihmë Turqisë pas tërmetit tragjik të 6 Shkurtit është kthyer sot në Tiranë.

Kanë qenë rreth 85 trupa, në përbërje të të cilëve ishin efektivë të Forcave të Armatosura, të Emergjencave Civile, ekipeve shëndetësore që kanë dhënë kontributin e tyre për 11 ditë intensive.

Ministri i Mbrojtjes Niko Peleshi teksa shpreh mirënjohjen e tij për 3 ekipet e vajzave dhe djemve nga Forcat e Armatosura, Emergjencat Civile dhe ekipet shëndetësore, thotë se kanë nxjerrë 26 persona nga rrënojat, mes tyre edhe të mbijetuar.

“Krenari dhe mirënjohje pafund për 3 ekipet e vajzave dhe djemve nga Forcat e Armatosura, Emergjencat Civile dhe ekipet shëndetësore që kontribuuan përgjatë 11 ditëve në operacionet e kërkim-shpëtimit në zonat e shkatërruara nga dy tërmetet e fuqishme në Turqi. Ata u nisën për t’u kthyer në Atdhe, duke marrë me vete edhe respektin e popullit turk, që njëherësh është vlerësim për Shqipërinë tonë. Të gatshëm dhe solidarë sa herë të jetë nevoja për kontributin tonë!”, shkruan Peleshi në Facebook.