Sa herë që mendojmë të përzgjedhim një destinacion për një fundjavë ndryshe nuk dimë nga t’ia nisim me kërkimet tona. Vetëm pak orë nga vendi ku jetoni, “ELLE” ju sugjeron 12 alternativat më të bukura të Evropës që duhet t’i vizitoni patjetër. Romën e “dolce vita” apo Berlinin muzikal. Shikoni më poshtë dhe vetëm zgjidhni një prej tyre.

Lisbonë – Atje shkohet për të shijuar ëmbëlsirën e Belemit, apo marrë tramin deri në Belvedere ku mund të provosh sardelet dhe kallamarët dhe në fund të shijosh koncertet e improvizuara në rrugën Baixa – Chiado.

Romë – Roma duhet vizituar për të hedhur një monedhë në “Montana dei Trevi”, për të shijuar akulloret  “Giolitti’, që të çohesh herët e të vizitosh kishat e vjetra dhe të përfitosh nga shëtitjet e qeta përreth qytetit Borgjez.

Milos – Sarakinino, një ishull i Greqisë në të cilin mund të shkohet për perëndimin e mrekullueshëm të diellit dhe agimet e tij. Atje mund të shijoni ujin e kristaltë të detit, por edhe të bëni një xhiro me varkë për të njohur ishullin. Ah, por mos harroni të provoni edhe djathin grek!

Valeta – Kryeqyteti i Maltës ofron një pamje fantastike nga Upper Barraca Garden, kopshte që do t’ju lënë pa mend në qytetin e rrethuar. Një shëtitje në Grand Harbour, një nga portet më të bukura të Europës nuk duhet humbur. Nuk duhet të lini pa provuar produktet vendase që shiten në treg.

Berlin – Në Berlin duhet të shkoni për të provuar jetën e natës në club-et mitike si Berghain, të merrni mikrofonin në dorë e të këndoni në karaoken gjigande Mauerpark. Mos harroni se duhet të shijoni patjetër perëndimin e diellit në stacionin radar të vjetër Teufelsberg, por edhe të provoni një “currywurst”.

Madrid – Atje shkohet për të parë universin e filmave të Pedro Almodovar, që të mbështesni ekipin e Real-it të Madridit, të bëni blerje të mira tek Mango dhe Zara. Të admironi Guernicën e Pikasos të ekspozuar në muzeun “Reina Sofia” dhe të shijoni një çokollatë me “churros”.

Praga – Në Pragë sugjerohet të udhëtohet në prag të Krishtlindjeve. Ajo vizitohet për bukurinë e sheshit në qytetin e vjetër, shëtitjen në urën Charles dhe karikaturat e saj, por edhe vlerësimin e modernizmit të murit të John Lennon.

Taormina– Vizitoni Taorminën për të admiruar Etnën, të ëndërroni me tragjeditë antike të Taorminës përballë detit. Të darkoni përballë një pamjeje mahnitëse në Castelmola.

Londër – Në Londër shkohet për të vizituar pallatin Kensington dhe familjen mbretërore. Të rrëkëlleni një çaj tipik anglez, të bëni një tur në Saatchi Gallery për të parë veprat kontemporane dhe të blini një libër në bibliotekën e madhe të Notting Hill.

Venecia – Venecia, qyteti nga i cili nuk mund të largohesh pa provuar një xhiro me gondola. Për të përjetuar periudhën e rilindjes duhet vizituar pallati Doges, por edhe ushqyer pëllumbat në sheshin San Marco.

Krakovia – Krakovia duhet vizituar për të shijuar tregun e bukur në pjesën e qytetit të vjetër. Më pas mund të shëtisni në sheshin Rynek e penetroni në Panteonin Polonez. Të provoni “pierogis”,  në restorantet tipikë të epokës sovjetike.

Paris – Parisi, atje shkohet për të humbur në rrugët e lagjeve latine, që të admironi kullën Eiffel, që të vizitoni kopshtet e Tuilerie, të bëni një selfie me Xhokondën dhe të provoni ushqimin e mrekullueshëm.