5 cilësi që mund të shkatërrojnë karrierën tuaj

Prishtinë | 25 Gus 2023 | 07:45 | Nga Ekonomia Online

Një numër i konsiderueshëm njerëzish e kalojnë pjesën më të madhe të kohës së tyre në zyrë. Është deri-diku i kuptueshëm fakti që duam të bëjmë përshtypje sa më të mirë, sidomos nëse jemi në një kompani të re, por në përpjekje për t’u bërë punonjësi më i mirë, nuk e kuptojmë se disa prej këtyre cilësive që mund të duken shumë pozitive mund të shndërrohen në faktorët kryesorë të shkatërrimit të karrierës sonë.

Ku jeni duke gabuar dhe si mund ta përmirësoni një gjë të tillë (gjithmonë nëse doni të ndryshoni). Gjeni më poshtë disa këshilla të përmbledhura nga Ekonomia Online:

Martiri i orëve të vona

Në çdo kompani ka gjithmonë një punonjës, i cili është i fundit që del nga puna. Disa prej tyre besojnë se kjo është një mënyrë e mirë për t’u dalluar nga të tjerët dhe për të bërë përshtypje të mirë tek eprori. Gjithsesi, për drejtuesit “martirët e orëve të vona” nuk kanë përparësi ndaj të tjerëve, sepse për ata nuk është e rëndësishme koha që shpenzoni në zyrë, por sa punë bëni. Prandaj këshillohet që të punoni gjatë orëve të vona, vetëm nëse keni vërtet punë dhe jo vetëm sa për t’u dukur apo për të lënë një përshtypje më të mirë (gjithmonë sipas jush).

I gjithanshmi

Këtë punonjës ju e ndeshni gjatë mbledhjes dhe pastaj si me magji ai ju shfaqet përpara kompjuterit të tij, duke përfunduar raportin e mbledhjes të sapozhvilluar. Sa ktheni kokën pas, e shihni sërish duke u marrë me diçka tjetër. Ai ndodhet kudo dhe duke u marrë me shumë gjëra njëkohësisht, por asnjëherë nuk e çon një projekt deri në fund. Kur kaloni nga një detyrë te një tjetër, ju shpërqendroheni dhe vini në lojë efikasitetin dhe produktivitetin tuaj. Një gjë e tillë do t’ju marrë më shumë kohë dhe në fund të ditës së punës, edhe pse keni shpenzuar të gjithë kohën e mundshme, nuk keni arritur të përfundoni asnjë prej detyrave të kërkuara.

Më efikasi

Pjesa më e madhe e punonjësve që do të lexojnë këtë artikull nuk do të bien dakord me një gjë të tillë, por në disa pozicione pune dhe në disa kompani të caktuara, të qenit shumë efikas mund të jetë shkatërrues për karrierën tuaj.

Ka pozicione të caktuara pune, ku ndaj punonjësve marrin masa të ndryshme vetëm sepse ata punojnë më shpejt seç duhet. Këshillohet që të gjitha punët që keni për të përfunduar gjatë ditës t’i mirëpjesëtoni me orët e punës. Sepse çfarë kuptimi do të kishte nëse ju i mbaroni të gjitha punët që në orën 13:00 dhe do të rrini tri orë të tjera kot duke mos bërë asgjë. Por kjo varet mbi të gjitha nga pozicioni i punës dhe nga kompania.

Llupësi i ëmbëlsirave

Ky punonjës i adhuron ëmbëlsirat dhe madje ka edhe dëshirë të gatuajë për stafin. Tek e fundit kush nuk i do ëmbëlsirat? Por, jo gjithmonë, sepse kjo ka edhe anën e saj negative.

Kur merrni me vete ëmbëlsira në ambientin e zyrës, nuk i respektoni dietat e kolegëve të tjerë. Edhe pse kjo është diçka që, në fund të fundit, nuk duhet t’ju interesojë, në mënyrë të pandërgjegjshme ju shkaktoni nervozizëm te kolegët tuaj, situatë që mund të përkeqësohet deri në konflikte verbale.

Sociali

Ky është tipi i punonjësit, i cili nuk mund të kalojë pa i përshëndetur të gjithë punonjësit e tjerë. Por edhe kjo ka anën e saj negative, sepse tipa të tillë vuajnë nga ‘diarreja e fjalëve’. Ata flasin, flasin, flasin dhe vetëm flasin, pa e kuptuar se kjo mund të bezdisë edhe kolegët e tjerë. Punonjës të tillë kthehen në kërcënim të shefave, të cilët mundohen që t’i mbajnë sa më larg kompanisë së tyre, dhe madje ka edhe nga ata eprorë që bëjnë të pamundurën për të mos lejuar socializimin e punonjësve me njëri-tjetrin.

Të ngjashme