Kryetari i Nismës Socialdemokrate, Fatmir Limaj, është deklaruar për medie para mbajtjes së seancës së ardhshme për konstituimin e Kuvendit të Kosovës, me ç’rast tha se zgjidhja e ngërçit aktual politik mund të arrihet vetëm përmes dialogut dhe marrëveshjeve ndërpartiake, raporton Ekonomia Online.

Sipas tij, është e nevojshme një marrëveshje politike dhe secila palë duhet të marrë përgjegjësinë që i takon. Ai theksoi gjithashtu se aktualisht nuk ka ndonjë aktor tjetër politik në skenë përveç atyre që janë tashmë të përfshirë.

“Forcat politike janë këto, rruga e vetme që Kosova si shtet është përmes bisedimeve. Secili duhet t’i thërras ndërgjegjes, në mënyrë që të përfundojë kjo situatë. Kosovën e presin shumë punë, telashe. 6 muaj nuk kemi qeveri efektive, vendi ka nevojë, na presin projekte, punë. Ne jemi të gatshëm të japim kontributin tonë, por forcat e mëdha e kanë përgjegjësinë kryesore”, tha Limaj.

Limaj nënvizoi se zgjidhja mund të vijë vetëm përmes negociatave ndërmjet forcave politike dhe shtoi se Nisma nuk ka marrë asnjë ftesë zyrtare për të dhënë propozime në lidhje me procesin e konstituimit të Kuvendit.