Ambasadori i Finlandës në Kosovë, Matti Nissinen, ka shprehur shqetësimin për ngërçin politik që ka bllokuar formimin e institucioneve pas zgjedhjeve të fundit, duke theksuar se kjo situatë po ndikon negativisht në funksionimin e brendshëm të shtetit dhe në raportet me Bashkimin Evropian.

Në një intervistë për KOHËN, ambasadori Nissinen tha se zvarritja e formimit të Kuvendit dhe Qeverisë rrezikon të minojë përparimin në fusha kyçe, përfshirë reformat, besimin e publikut dhe rrugën drejt integrimeve euroatlantike.

“Stabiliteti dhe parashikueshmëria politike janë thelbësore për zhvillimin e çdo vendi. Rikthimi i funksionalitetit të institucioneve ndihmon në ruajtjen e besimit të publikut. Politikanët njihen për aftësinë e tyre për të arritur kompromis, ndaj unë kam besim në aftësitë e tyre. Së pari dhe mbi të gjitha, nevojitet vullnet politik,” theksoi ai.

Sipas tij, vonesat institucionale mund të bllokojnë reformat e nevojshme dhe të dëmtojnë momentumin drejt integrimit evropian. Ai e cilësoi funksionimin e qeverisë si një sinjal të rëndësishëm për maturinë politike dhe besueshmërinë ndërkombëtare të Kosovës.