Kryetari i Lidhjes Demokratike të Kosovës (LDK), Lumir Abdixhiku, ka prezantuar në një tubim zgjedhor në Malishevë kandidatin e kësaj partie për kryetar Komune, Fatmir Ademajn, raporton Ekonomia Online.

Në fjalën e tij, Abdixhiku e quajti Malishevën “zemra e Kosovës punëtore” dhe theksoi se ky qytet meriton më shumë nga qeverisja lokale.

Ai u zotua për mbështetje të drejtë dhe të vazhdueshme për bujqësinë dhe zhvillimin e qytetit.

“Malisheva është zemra e Kosovës punëtore. Është djepi i bujqësisë sonë, është vatra e familjeve të mëdha, është simbol i qëndresës dhe i dinjitetit. Ky qytet ka dhënë shumë për Kosovën, shumë për lirinë tonë, shumë për pavarësinë tonë, shumë për zhvillimin e vendit tonë. Dhe prandaj, sonte, të jem mes jush është një emocion i veçantë, është një nder i madh, është një përgjegjësi e madhe. Sepse Malisheva e meriton fjalën tonë. Malisheva e meriton përkushtimin tonë. Malisheva e meriton qeverisjen tonë. Në këtë qytet të punës, të bujqësisë, të mundit, Lidhja Demokratike e Kosovës është gjithmonë pranë qytetarëve. Sepse ne e dimë se këtu nuk ka vend për fjalë boshe, këtu nuk ka vend për premtime të kota, këtu ka vend vetëm për punë, për përkushtim, për rezultate”.

“Dhe këtë e ka sjellë gjithmonë LDK-ja. Sot jemi këtu për një betejë të madhe. Për një betejë që nuk është vetëm e Malishevës, por është betejë e gjithë Kosovës. Sepse fitorja këtu, në Malishevë, është fitorja e arsyes mbi mashtrimin. Është fitorja e punës mbi propagandën. Është fitorja e shpresës mbi zhgënjimin. Është fitorja e së ardhmes mbi të kaluarën. Në këtë betejë, ne kemi një emër, një kandidat, një lider që mishëron punën, përkushtimin, ndershmërinë. Një njeri që është rritur këtu, që i njeh hallet e këtij qyteti, që i jeton sfidat tuaja çdo ditë, që është pranë jush në çdo lagje, në çdo fshat, në çdo rrugë. Ky është kandidati ynë për Malishevën. Ky është kandidati i fitores. Ky është Fatmir Ademaj”, prezantoi i pari i LDK-së.  

Ai shtoi se ekipi i LDK-së në këtë komunë është i përbërë nga profesionistë e njerëz të ndershëm, të cilët synojnë të sjellin qeverisje me përgjegjësi dhe rezultate.

“Fatmir Ademaj është njeri i qytetit të tij. Është biri i Malishevës. Është njeriu që nuk e sheh politikën si privilegj, por si shërbim. Nuk e sheh pushtetin si përfitim, por si përgjegjësi. Nuk flet me slogane, por punon me përkushtim. Nuk premton gjëra të pamundura, por jep fjalën për gjëra të arritshme. Dhe kjo është ajo që i duhet Malishevës. Një kryetar që nuk fsheh problemet, por i përballon ato. Një kryetar që nuk ikën nga përgjegjësia, por e merr mbi vete. Një kryetar që nuk harron qytetarët, por i bën ata pjesë të qeverisjes. Ky është Fatmir Ademaj. Kjo është LDK-ja. Por Fatmiri nuk është vetëm. Përkrah tij është lista e Lidhjes Demokratike të Kosovës për Asamblenë Komunale të Malishevës. Një listë e fortë, një ekip i madh, një grup njerëzish të ndershëm, profesionistë, të përkushtuar, që hyjnë në politikë jo për privilegj, por për të shërbyer. Jo për përfitim, por për të dhënë kontribut. Jo për poste, por për dinjitet. Ky është ekipi ynë. Ky është garancia që fjala e dhënë do të kthehet në vepra. Ky është dallimi ynë me të tjerët. Malisheva meriton më shumë. Për vite të tëra ky qytet është përdorur për votë, por nuk është respektuar me punë. Është lënë në harresë, është mbajtur peng i paaftësisë, është trajtuar si skenë personale, e jo si qendër e zhvillimit. Dhe prandaj, sot ne jemi këtu për t’i dhënë fund kësaj padrejtësie. Jemi këtu për t’i dhënë fund kësaj harrese. Jemi këtu për t’i dhënë fund kësaj paaftësie. Sepse Malisheva meriton më shumë. Sepse qytetarët e Malishevës nuk janë qytetarë të dorës së dytë. Sepse Malisheva është pjesë e pandashme e Kosovës, është krenaria e Kosovës, është forca e Kosovës. Ne do ta sjellim këtë më shumë. Do ta sjellim në bujqësi. Fermerët e Malishevës nuk do të jenë më të harruar. Ata do të kenë mbështetje të drejtë, të barabartë, të ndershme. Do të kenë përkrahje të vazhdueshme, me ndershmëri, me përgjegjësi, me vizion”, shtoi ai.